Fjármálaeftirlitið er nú með fleiri en eitt mál til skoðunar sem tengjast mögulegri markaðsmisnotkun. Þetta kemur fram í skriflegu svari frá stofnuninni en Morgunblaðið leitaði upplýsinga hjá FME um hvaða fyrirtæki ætti í hlut í máli sem Nasdaq OMX Iceland vísaði til FME á þriðja ársfjórðungi. Í Morgunblaðinu á fimmtudag var greint frá því að Nasdaq hefði í ársfjórðungsskýrslu sinni um eftirlitsmál á vettvangi kauphallarviðskipta í Evrópu greint frá því að einu máli er varðaði meinta markaðsmisnotkun hefði verið vísað til frekari skoðunar eftirlitsyfirvalda. Í svari FME kemur fram að stofnuninni berist reglulega „fjöldi ábendinga og vísana, m.a. um mögulega markaðsmisnotkun, bæði frá Kauphöll og öðrum,“ eins og það er orðað í svarinu. Þar segir einnig að farið sé yfir allar ábendingar og vísanir sem berast og metið hvort þörf sé á frekari aðgerðum.
Stofnunin gefur hins vegar ekki upp hvaða mál séu til skoðunar á hverjum tíma eða hvaða fyrirtæki eigi þar í hlut. ses@mbl.is
Til baka
Leita í greinasafni
Prenta grein
