„Fróðir menn segja: Ef þú hefir sjeð London þá hefir þú sjeð heiminn.“ Þetta var fullyrt í auglýsingu með hálfgerðu stríðsletri sem birtist á forsíðu Morgunblaðsins fyrir réttum 90 árum, 4. nóvember 1928. Á þeim tíma skrapp landinn vitaskuld ekki á hverjum degi til útlanda, hvað þá til London. „Það er mikill sannleikur í þessu,“ hélt auglýsandinn, Knattspyrnufjelag Reykjavíkur, áfram. „Stórkostleg hlutavelta verður haldin í dag í stórhýsi að Þormóðsstöðum við Skerjafjörð. (Gengið fram hjá Loftskeytastöðinni suður fyrir Grímstaðaholtið. – 15 mínútna gangur úr miðbænum). Hlutaveltan hefst kl, 2 e. h. Margir afskaplega spennandi drættir. Þar á meðal einn sem gildir alla leið suður til Lundúnaborgar og aftur heim til gamla Fróns. Þá er ferð upp til skýja með flugvjelinni næsta sumar.“ Almennilegt að bjóða upp á flug heim líka.
Ekki nóg með það. „Hvað segið þjer um það að fá fyrir 50 aura Ljósakrónu, sem er 75 króna virði, eða þá kol í tonnatali; tunnu fulla af olíu, hvort heldur þjer viljið Mjallhvít eða Sunnu.“
Drátturinn kostaði aðeins 50 aura og inngangur sama. Eftir hlutaveltuna átti að vera dans, veitingar, gosdrykkir og fleira.
Til baka
Leita í greinasafni
Prenta grein
