Leynivopn í eldhúsinu

Dagný Hermannsdóttir sendi frá sér fyrr á árinu bókina Súrkál fyrir sælkera. Í bókinni eru góð ráð til eigin framleiðslu og fjöldi uppskrifta af ýmsu tagi. Hún byrjaði á því að búa til súrkál aðallega vegna þess að hún vildi bæta meltinguna og er hún ánægð með hversu jákvæð áhrif þetta hefur haft á heilsuna. Það sem kom henni mest á óvart var að henni skyldi finnast þetta svona gott.

„Það sem kom mér mest á óvart var hvað ég varð sólgin í þetta. Þegar ég byrjaði fannst mér þetta bara allt í lagi og ég ætlaði bara að taka þetta inn eins og lýsi, skella þessu í mig. Svo bara fór mér að finnast þetta svo hrikalega gott og passa með öllu. Þá fór ég að fá hugmyndir að gera eitthvað öðruvísi, úr öðru grænmeti og krydda þetta og síðan hef ég bara verið óstöðvandi,“ segir Dagný sem gat einmitt ekki rætt við blaðamann daginn áður þar sem hún var svo upptekin við súrkálsgerð í Matís. Hún framleiðir nefnilega súrkál sem selt er í „betri búðum“ eins og hún orðar það.

„Það sem kom mér líka á óvart var hvað þetta getur verið fjölbreytt. Það er hægt að gera þetta úr næstum því öllu grænmeti og svo margt ólíkt. Mér fannst að það hefði opnast heill heimur fyrir mér í matargerð sem ég hafði ekki hugmynd um,“ segir hún.

Skapandi súrkálsgerð

„Ég hef líka áhuga á ræktun og rækta eins og ég get en það er svo stuttur tími á árinu sem maður er í því. Ég er að fá svipað út úr súrkálsgerðinni; maður er að setja eitthvað af stað, fylgjast með því þroskast, njóta þess hvað þetta lyktar vel og er fallegt og svo er bara komið að uppskeru þegar þetta er tilbúið. Ég fæ svipað „kikk“ út úr þessu eins og þegar maður er að búa til eitthvað í höndunum eða að rækta, þetta er svo skapandi ferli. Ég fæ ekki leið á þessu. Meira að segja þó að ég sé að framleiða í stórum stíl til sölu í Matís þá dettur mér í hug að búa til súrkál heima hjá mér líka ef ég fæ einhverja hugmynd.“

Nýtt á markað frá Dagnýju er súrskot, sem fæst í Fjarðarkaupum og Frú Laugu. „Safinn er aukaafurð en það verður oftast dálítill safi umfram í framleiðslunni, sem er fullur af góðgerlum,“ segir Dagný sem bendir fólki á í bókinni að nota afgangssafann í matargerð.

„Safinn er algjört gull í matargerð; út í sósuna, salatdressinguna eða súpuna, svona sem leynivopn í eldhúsinu,“ segir hún.

„Eitt sem er svo magnað við súrkálsgerðina er að þetta er ekki endilega fyrir þá sem vilja eyða öllum sínum tíma í eldhúsinu heldur er þetta svo mikið spurning um fjölbreytni í mataræði. Mér finnst svo frábært að eiga alltaf alls konar meðlæti tilbúið í ísskápnum. Sama hvaða letimáltíð maður snarar upp hvunndags þá verður hún alltaf betri ef maður hefur eitthvað skemmtilegt súrkál með. Það passar meira að segja með grillaðri samloku. Spælegg verður alveg æði ef þú berð það fram með kimchi,“ segir hún en kimchi er kóreskt súrkál.

Fyrir áhugasama heldur Dagný líka námskeið í súrkálsgerð en nánari upplýsingar um það er að finna á surkal.is.