Geirlaug Guðmundsdóttir

Rigningarsumarið 1955 er okkur systrum minnisstætt er við fluttumst frá Reykjavík til Hafnafjarðar. Fyrir neðan Sankti Jóseps spítala á Suðurgötu eyddum við öllu sumrinu í stígvélum og pollagöllum við hörku stíflugerð. Geirlaug var bæði með góða og ljúfa lund, alltaf til í að hjálpa okkur yngri systrunum í einu og öllu. Það var oft mikið fjör á heimilinu þegar Geirlaug og Auður voru komnar á gelgjuna. Borð og stólar voru þá færðir til í stofunni og við tvíburarnir fengum þá oftast að vera með ásamt vinkonum þeirra á rokk- og tjútttímabilinu þar sem tónlistin var sett í botn en það þótti okkur ekki leiðinlegt. Tuttugu ára fór Geirlaug sem „au pair“ til London en Auður, þá átján ára, og vinkonur hennar fóru á síldarvertíð á Raufarhöfn. Þessu ævintýri þeirra fylgdumst við tvíburarnir spenntar með. Geirlaug keypti þessar flottu nýtísku fermingarkápur úr krulluefni og við upplifðum okkur sko flottastar á þeim tíma í tískufötum frá útlöndum.

Elsku Geirlaug okkar, þú fórst í Húsmæðraskóla Reykjavíkur og lærðir þar ýmislegt hagnýtt og meðal annars saumaðir þú gullfallegan skírnarkjól sem við systurnar höfum fengið að nota síðan fyrir börn okkar og barnabörn.