Christkindlmarkt er einn af þessum gömlu jólamörkuðum sem mikil hefð er fyrir en fyrstu rituðu heimildir um markaðinn eru frá 15. öld. Markaðurinn er við rætur Hohensalzburg-virkisins og er í kringum hina mikilfenglegu dómkirkju borgarinnar. Margir viðburðir fara þarna fram eins og kórsöngur og spilað er á vindhljóðfæri, „Turmblasen“.
Í borginni eru margir jólamarkaðir en fyrrnefndi markaðurinn er þeirra elstur. Í Hellbrunn er gott að fara með börn en t.d. er í boði að fara í sleðaferð í sleða dregnum af alvöruhreindýri. Mirabell-torg er fallega skreytt og þar eru margir básar með jólagóðgæti og glöggi.
Ennfremur er viðamikil dagskrá í borginni á sérstakri aðventuhátíð sem stendur yfir helgarnar fyrir jól með miklum söngveislum. Í ár er búið að selja alls 36.000 miða og er því uppselt á alla tónleikana (þótt stundum sé hægt að fá miða á síðustu stundu) en byrjað er að selja miða á aðventuhátíðina 2019.