Kínverski hershöfðinginn He Lei varaði stuðningsmenn sjálfstæðis Taívans við því í gær að þeir kynnu að vera dæmdir sem „stríðsglæpamenn“ ef svo færi að kínverski herinn neyddist til að taka eyjuna með hervaldi.
„Stuðningsmenn aðskilnaðarins verða að hætta í tæka tíð til þess að forðast stórslys, sjá að sér og snúa aftur á rétta braut. Annars eiga þeir á hættu að verða úrhrök kínversku þjóðarinnar, fordæmdir af sögunni,“ sagði He á blaðamannafundi sínum.
Ummæli Hes voru látin falla í kjölfar þess að Xi Jinping, forseti Kína, tilkynnti í síðustu viku að Kínverjar myndu ekki hafna þeim möguleika að hervaldi yrði beitt gegn Taívan, og lofaði því að sameining Kína og Taívan væri „óumflýjanleg“. Stjórnvöld í Kína líta svo á að Taívan sé enn hluti af ríki sínu, þó að eyjan hafi ekki lotið stjórn þeirra frá lokum kínversku borgarastyrjaldarinnar árið 1949.
Til baka
Leita í greinasafni
Prenta grein
