Alls bjuggu 357.050 manns á Íslandi í lok síðasta árs, 182.870 karlar og 174.180 konur. Landsmönnum fjölgaði um 1.420 á fjórða ársfjórðungi eða um 0,4%. Á höfuðborgarsvæðinu bjuggu 228.260 manns en 128.780 utan þess. Samtals fæddust 1.080 börn á síðustu þremur mánuðum nýliðins árs, en 560 einstaklingar létust. Á sama tíma fluttust 910 manns til landsins umfram brottflutta. Brottfluttir með íslenskt ríkisfang voru fimm umfram aðflutta, en aðfluttir erlendir ríkisborgarar voru 920 fleiri en þeir sem fluttust frá landinu. Danmörk var helsti áfangastaður brottfluttra íslenskra ríkisborgara en þangað fluttust 120 manns á 4. ársfjórðungi. Til Danmerkur, Noregs og Svíþjóðar fluttust 240 íslenskir ríkisborgarar af 470. Af 1.200 erlendum ríkisborgurum sem fluttust frá landinu fóru flestir til Póllands, 400 manns.