26 stiga útspil.

26 stiga útspil. A-NS

Norður
♠G64
♥Á762
♦K84
♣1083

Vestur Austur
♠10 ♠D3
♥9854 ♥KDG10
♦Á653 ♦10
♣G964 ♣ÁKD752

Suður
♠ÁK98752
♥3
♦DG972
♣--

Suður spilar 6♠ doblaða.

Við erum stödd í æfingaleik Hollendinga og Norðmanna á BBO. Austur opnar á Standard-laufi og suður stekkur í 4♠ – á hættu gegn utan. Pass og pass til austurs. Á að gefast upp, þar og þá?

Nei, nei, nei. Hvorki Tor Eivind Grude né Bob Drijver létu uppgjöf hvarfla að sér. En Grude valdi vafasama sögn – hann doblaði. Líklega var einhver úttektarhugsun að baki doblinu, en makker hans, Tor Bakke, var ekki á sömu línu og sagði pass. Lauf út og tólf slagir.

Hinum megin sagði Drijver einfaldlega 5♣ við 4♠. Þá tók við barátta upp í 6♠. Allan Livgaard í suður sagði 5♦, Bart Nab í vestur 6♣ og Terje Aa í norður 6♠. Nab doblaði, lagði niður tígulás og gaf makker stungu! Einn niður.

Slemman vinnst auðvitað með öðru útspili og þá hefðu Hollendingar tapað 10 stigum (impum) á spilinu í stað þess að vinna 16.