Vill fara varlega af stað með sjálfakandi bíla

Forstjóri Volvo Cars varar við því að ef farið verður of geyst í að setja sjálfakandi bíla á markað gæti það í reynd haft þau áhrif að hamla þróun þessarar tækni sem ætti að verða „mesta framfaraskref sögunnar í öryggismálum bifreiða.“

Hakan Samuelsson segir að það væri „óábyrgt“ að taka sjálfstýrða bíla í almenna notkun áður en þeir væru orðnir nægilega öruggir, því ef slysin hendir á það eftir draga úr tiltrú almennings og auka á tortryggni stjórnvalda.

Vilja ryðja brautina á ný

„Þessi ábyrgð hvílir á okkur og öllum hinum sem eru að þróa sjálfakandi bíla. Annars er hættan sú að við gerum út af við þessa tækni sem gæti vel reynst verða besta öryggistækið sem þróað hefur verið fyrir einkabílinn,“ segir hann.

Samuelsson lét þessi ummæli falla þegar Volvo hratt af stað nýju umferðaröryggisverkefni sem miðar að því að nota nýjustu tækni til að binda enda á akstur undir áhrifum áfengis, truflun frá snjallsímum í akstri, og of hraðan akstur. Vonast Volvo til að þetta nýja útspil fyrirtækisins muni smita út frá sér til annarra bílaframleiðenda, rétt eins og þriggja punkta bílbeltið gerði fyrir 60 árum.

Lofa of miklu

Sumir framleiðendur hafa sett á markað bíla með tækni sem getur bæði stjórnað stefnu bílsins og hraða þegar ekið er á hraðbrautum. En Samuelsson segir að ef framleiðendur þessara bíla ýkja eiginleika þeirra þá sé hætt við að ökumenn reiði sig um of á tæknina og að slys hljótist af.

„Fara þarf mjög varlega þegar svona tækni kemur á markað, og tel ég að sjálfstýringin þurfi að vera enn öruggari en ökumaðurinn heldur,“ segir hann og bætir við að þegar upp er staðið hvíli ábyrgðin á þessum ökutækjum „hjá þeim sem eru að selja sjálfstýringarbúnaðinn“.

Hann bætir við að: „Það að hefja sölu á sjálfakandi bílum án þess að vera þess fullviss að þeir verði ekki valdir að slysum væri mjög óábyrgt.“

Þó svo að Samuelsson hafi ekki nefnt neina framleiðendur á nafn má telja nokkuð víst að hann sé einkum að vísa til Tesla sem hefur kallað hraðbrauta-aksturskerfi sitt „sjálfstýringu“ og haldið því fram að ökutækin sem fyrirtækið framleiðir séu „með öllu sjálfakandi“.

Nokkur banaslys

Finna má nokkur tilvik þar sem banaslys hlaust af þegar ökumenn Tesla-bifreiða slepptu höndum af stýrinu og hættu að fylgjast með akstrinum á meðan sjálfvirk stýring og bremsustjórnun bílanna var í gangi.

Margir bílaframleiðendur ákváðu að gera hlé á prófunum sjálfakandi bíla í kjölfar þess að gangandi vegfarandi lét lífið eftir að hafa orðið fyrir sjálfakandi Volvo-bíl í prófunum hjá Uber. Við nánari skoðun kom þó í ljós að skutlfyrirtækið hafði slökkt á miklu af þeim öryggisbúnaði sem Volvo hafði komið fyrir í bílnum.

Horfir í augu ökumanns

Bílaframleiðendur og tæknifyrirtæki vinna að því að þróa sjálfstýringarkerfi fyrir bíla svo að umferðarslys þar sem banaslys verða geti heyrt sögunni til en ár hvert lætur meira en milljón manns lífið í umferðinni.

Í síðustu viku kynnti Volvo til sögunnar úrval nýrra tæknilausna sem fyrirtækið telur að muni geta dregið enn frekar úr banaslysum í umferðinni með því að koma í veg fyrir hraðakstur, akstur undir áhrifum áfengis og notkun snjallsíma undir stýri.

Snemma á næsta áratug verða nýjar Volvo-bifreiðar búnar myndavél sem vaktar augnhreyfingar ökumanns og greinir hvenær hann er með athyglina við eitthvað annað en veginn.

Einnig stendur til að nota staðsetningartækni til að kortleggja svæði þar sem bílar munu sjálfkrafa hægja ferðina, s.s. í kringum skóla.

Jafnframt mun nýja tæknin frá Volvo nota staðsetningu bílsins og upplýsingar um ástand vega til að takmarka hámarkshraða í hálku og þoku, sem Samuelsson segir „áhrifaríkari“ leið en að stóla á hraðaskilti.

„Bíllinn mun vita að vegurinn er átta metra breiður og hlykkjóttur, og að frost er, myrkur og snjór. Mjög vönduð algrími munu þá reikna það út að bíllinn megi ekki fara hraðar en á 75 km/klst á umræddum vegarspotta,“ segir hann.