Íris Björk skellti í lás

Handbolti

Andri Yrkill Valsson

Ívar Benediktsson

Valur og Fram eru komin yfir í undanúrslitaeinvígunum um Íslandsmeistaratitil kvenna í handknattleik eftir fyrstu leikina í úrslitakeppninni sem hófst um helgina. Valur vann Hauka 24:19 og Fram vann ÍBV 31:25.

Valskonur lentu ekki í teljandi erfiðleikum að Hlíðarenda þegar Haukar komu í heimsókn. Haukar komust í 2:0 áður en vörn Vals small saman og Íris Björk Símonardóttir lokaði markinu þar fyrir aftan, en alls varði hún 14 skot í fyrri hálfleik einum. Fimm mörk Vals í röð eftir rólega byrjun gáfu tóninn fyrir framhaldið á meðan Haukar náðu aðeins að bæta við fjórum mörkum í viðbót fram að leikhléi. Staðan 12:6 í hálfleik og Haukar náðu minnst að minnka muninn í fjögur mörk eftir hlé, lokatölur 24:19.

Sókn Hauka var þeirra hausverkur í leiknum og eitthvað sem þarf að laga fyrir næsta leik einvígisins í kvöld. Valskonur, sem þegar hafa unnið bikar- og deildarmeistaratitlana það sem af er tímabili, spiluðu hins vegar gegnheilli leik í vörn og sókn. Smá hikst í upphafi leiks og strax eftir hlé ætti að vera auðveldara að laga en að fara ofan í saumana á sókninni líkt og andstæðingurinn þyrfti að gera til þess að snúa taflinu við í einvíginu.

Sterkur lokakafli

Viðureign Fram og ÍBV var jöfn í ríflega 45 mínútur. ÍBV var með tveggja marka forskot, 19:17, eftir ríflega tíu mínútna leik í síðari hálfleik. Þá tók Fram-liðið sig til og skoraði átta mörk gegn aðeins tveimur frá ÍBV. Þennan mun tókst ÍBV-liðinu aldrei að vinna upp.

Karen Knútsdóttir fór á kostum í sóknarleik Fram, ekki síst í síðari hálfleik þar sem hún átti þátt í nær öllum mörkum liðsins. Sara Sif Helgadóttir átti einnig stórgóðan leik í marki Fram-liðsins og varði alls 15 skot. Fleiri leikmenn Fram léku vel á sama tíma og fáar úr Eyjaliðinu náðu heilsteyptum leik. Eyjaliðið sýndi hinsvegar á köflum að það getur vel gert Fram-liðinu skráveifu. Þess vegna má alveg reikna með að rimma liðanna geti teygst á langinn.