Jón Birgir Eiríksson
jbe@mbl.is
„Af því við erum ekki eigendur hússins mun ég ekki tjá mig um ástand þess,“ segir Alma D. Möller landlæknir, spurð út í myglu í húsnæði embættis landlæknis við Barónsstíg og flutninga, en auglýst hefur verið eftir nýju húsnæði til leigu.
Óháður matsmaður lauk við úttekt á ástandi húsnæðisins fyrir um tveimur vikum og að sögn Ölmu var ákvörðun tekin um flutninga í kjölfarið og leigusamningi til ársins 2026 rift á grundvelli 1. og 3. tl. 60. gr. húsaleigulaga. Riftunin er þannig byggð á því að leigusali hafi ekki bætt úr annmörkum á hinu leigða húsnæði og því að húsnæðið hafi spillst þannig [...] að það nýtist eigi lengur til fyrirhugaðra nota eða teljist heilsuspillandi að mati heilbrigðisyfirvalda. Áður höfðu landlæknisembættið og húseigandi látið skoða húsnæðið í sitthvoru lagi, en niðurstöður úttektanna stönguðust á. Því var ákveðið að fá óháðan aðila.
Þorsteinn Steingrímsson húseigandi sagði á vef RÚV að myglu og skemmdir í húsinu væri að rekja til sóðaskapar og vanrækslu landlæknisembættisins. Þessu hafnar landlæknir. „Það er mjög skýrt í skýrslu matsmanns að þetta hefur ekkert með okkur að gera,“ segir Alma.
Til baka
Leita í greinasafni
Prenta grein
