Knattspyrnumaðurinn Kjartan Henry Finnbogason er kominn í hóp þeirra Íslendinga sem hafa skorað 100 mörk í deildakeppni á ferlinum. Hann náði þeim áfanga með marki fyrir Vejle í leik gegn Nordsjælland í dönsku úrvalsdeildinni fyrir skömmu og bætti um betur á sunnudaginn þegar hann gerði eitt marka Vejle í 4:1 sigri á SönderjyskE í dönsku úrvalsdeildinni en þar fékk lið hans þá mikilvæg stig í botnbaráttu deildarinnar.
Kjartan skoraði 38 mörk fyrir KR í úrvalsdeildinni á sínum tíma og hann hefur nú skorað 63 mörk í deildakeppni í fjórum öðrum löndum. Eitt fyrir Åtvidaberg í Svíþjóð, tíu fyrir Sandefjord í Noregi, eitt fyrir Falkirk í Skotlandi, 48 fyrir Horsens í Danmörku og nú er hann kominn með þrjú mörk fyrir Velje eftir að hafa byrjað að spila með liðinu í febrúarmánuði. Kjartan lék fyrri hluta tímabilsins með Ferencváros í Ungverjalandi, náði ekki að skora í deildinni en gerði sex mörk í bikarleikjum. vs@mbl.is
Til baka
Leita í greinasafni
Prenta grein
