Afskekkt fjallasvæði, sem talið var laust við plastmengun, er í raun þakið örplastögnum sem hafa borist þangað með vindum. Er mengunin svipuð og í stórborgum á borð við París, að sögn vísindamanna.
Í grein, sem birtist í gær í vísindatímaritinu Nature Geoscience , kemur fram að á fimm mánaða tímabili á árunum 2017 og 2018 féllu að jafnaði 365 örplastagnir á hvern fermetra á óbyggðu svæði í Pýreneafjöllum í um 1.500 metra hæð á landamærum Frakklands og Spánar.
„Það er stórfurðulegt og uggvænlegt að svo margar agnir skyldu finnast á þessu svæði,“ sagði Steve Allen, doktorsnemi í Strathclyde háskóla í Skotlandi og aðalhöfundur greinarinnar.
Deonie Allen, vísindamaður hjá EcoLab í Toulouse og einn af meðhöfundum greinarinnar, sagði að merkilegasta niðurstaða rannsóknarinnar væri að örplast berist milli staða í andrúmsloftinu og safnist saman á afskekktum stöðum langt frá stórborgum.
Rannsóknin beindist að örplastögnum sem eru 10-150 míkrómetrar í þvermál. Mannshár er til samanburðar um 70 míkrómetrar í þvermál. Vísindamennirnir sögðu að það hefði komið mjög á óvart að magn plastagnanna hefði verið svipað og í stórborgum á borð við París og kínversku iðnaðarborginni Dongguan.
Til baka
Leita í greinasafni
Prenta grein
