Arsenal styrkti stöðu sína í hörðum slag um sæti í Meistaradeild Evrópu í knattspyrnu í gærkvöld með útisigri gegn Watford, 1:0.
Pierre-Emerick Aubameyang skoraði sigurmarkið strax á 10. mínútu eftir mikil mistök Ben Foster í marki Watford en hann skaut boltanum í Gabonmanninn og þaðan hrökk hann í netið.
Mínútu síðar fékk Troy Deeney, fyrirliði Watford, rauða spjaldið fyrir að gefa Shkrodan Mustafi, varnarmanni Arsenal, olnbogaskot í andlitið. Watford var því manni færri í rúmar 80 mínútur en gerði samt oft harða hríð að marki Arsenal.
Lið Arsenal stendur ágætlega að vígi í slagnum um þriðja og fjórða sætið. Liðið er skrefi á undan Chelsea og Manchester United og á eina þægilegustu leikjadagskrána framundan. Arsenal mætir Crystal Palace, Wolves, Leicester, Brighton og Burnley á lokasprettinum. vs@mbl.is