Svava Árný Jónsdóttir fæddist 21. mars 1952. Hún lést 20. apríl 2019.
Útför Svövu fór fram 3. maí 2019.
Elsku systir og mágkona.
Sárt er vinar að sakna.Sorgin er djúp og hljóð.
Minningar mætar vakna.
Margar úr gleymsku rakna.
Svo var þín samfylgd góð.
Daprast hugur og hjarta.
Húmskuggi féll á brá.
Lifir þó ljósið bjarta,
lýsir upp myrkrið svarta.
Vinur þó félli frá.
Góða minning að geyma
gefur syrgjendum fró.
Til þín munu þakkir streyma.
Þér munum við ei gleyma.
Sofðu í sælli ró.
(Höf. ók.)
Kæri Binni og fjölskylda, innilegar samúðarkveðjur. Megi Guð styrkja ykkur í sorginni, en minningin um góða konu mun ætíð lifa.
Jenný og Reynir.
Ég sendi þér kæra kveðju,
nú komin er lífsins nótt,
þig umvefji blessun og bænir,
ég bið að þú sofir rótt.
Þó svíði sorg mitt hjarta
þá sælt er að vita af því,
þú laus ert úr veikinda viðjum,
þín veröld er björt á ný.
Ég þakka þau ár sem ég átti,
þá auðnu að hafa þig hér,
og það er svo margs að minnast,
svo margt sem um hug minn fer,
þó þú sért horfinn úr heimi,
ég hitti þig ekki um hríð,
þín minning er ljós sem lifir
og lýsir um ókomna tíð.
(Þórunn Sigurðardóttir)
Þín er sárt saknað.
Elsku Binni, Dúddi, Fjóla, Berglind og fjölskyldur, innilegar samúðarkveðjur. Hugur okkar og hjarta er hjá ykkur.
Anna María Reynisdóttir og
fjölskylda.
Helgi Einar og Ármann.
Svo viðkvæmt er lífið sem vordagsins blóm
er verður að hlíta þeim lögum
að beygja sig undir þann allsherjardóm
sem ævina telur í dögum.
Við áttum hér saman svo indæla stund
sem aldrei mér hverfur úr minni.
Og nú ertu genginn á guðanna fund
það geislar af minningu þinni.
(Friðrik Steingrímsson)
Þessi orð eiga vel við nú þegar við kveðjum kæra vinkonu okkar, hana Svövu.
Við vissum auðvitað að hún var búin að vera veik nokkuð lengi en við áttum alls ekki von á þessu svona fljótt. Kannski af því að við heyrðum hana aldrei kvarta, hún sagðist alltaf vera bara ágæt, kannski svolítið orkulaus en annað ekki.
Það er margs að minnast eftir vinskap sem varað hefur í meira en hálfa öld og aldrei borið skugga á. Og enn hefur verið höggvið stórt skarð í vinahópinn okkar en þrjú eru farin á undan henni.
Við minnumst allra skemmtilegu ferðanna okkar bæði erlendis og ekki síður hér innanlands. Við Björg og Óli minnumst yndislegrar ferðar til Taílands með Svövu og Binna, þar treystust vinaböndin enn frekar.
Einnig er mjög minnisstæð ferð þegar hópurinn fór í siglingu í Karíbahafinu og til Dóminíska lýðveldisins, var það einnig frábær ferð eins og reyndar allar ferðirnar okkar saman. Útilegur okkar vinanna eru óteljandi og allar geyma þær góðar minningar um söng, hlátur og gleði. Við vorum stundum spurð að því hvort við gerðum okkur grein fyrir hvað svona vinskapur væri mikilvægur en okkur fannst þetta bara svo sjálfsagt, hafði alltaf verið svona og við þekktum ekkert annað.
Við vinkonurnar vorum flestar mjög virkar í Slysavarnadeildinni Þórkötlu og voru Björg og Svava þar í stjórn í mörg ár.
Já það er margs að minnast og við vitum að við eigum eftir að sakna vinkonu okkar endalaust.
Við kveðjum þig með sára sorg í hjarta
söknuðurinn laugar tári kinn.
Dregur ský á dagsins ásýnd bjarta
dökkur skuggi fyllir huga minn.
Í miðjum leik var komið til þín kallið
klippt á strenginn þinn.
Eitt af vorsins fögrum blómum fallið.
(Hákon Aðalsteinsson)
Hvíl í friði, kæra vinkona, og hafðu þökk fyrir allt og allt.
Elsku Binni, Dúddi, Fjóla, Berglind og fjölskyldur, okkar innilegustu samúðarkveðjur. Missir ykkar er mikill en Guð gefi ykkur styrk.
Stefanía Björg og Ólafur Þór,
Elísabet og Daníel.
Svava var hörkudugleg og kvartaði aldrei og tókst á við veikindi sín af æðruleysi og þrautseigju og fannst mér mjög fallegt að sjá hve samrýmd þau hjónin voru og fjölskyldan á þessum tímum. Binni, Dúddi, Fjóla og Berglind, mig langar að senda ykkur og fjölskyldum ykkar mínar innilegustu samúðarkveðjur og vona að Guð styrki ykkur í sorginni.
Sigurbjörg Ásgeirsdóttir.