„Arður Landsvirkjunar verður til í virkjunum í náttúrunni úti á landi en ekki á Háaleitisbraut í Reykjavík. Mér finnst að hluti arðsins ætti að skila sér til baka,“ segir Helgi Kjartansson, oddviti Bláskógabyggðar. Vísar hann til þess að skrifstofur fyrirtækisins eru við þá götu.
Sveitarstjórn Bláskógabyggðar samþykkti bókun þar sem því er beint til iðnaðarráðherra að raforkuverð í dreifbýli verði jafnað. Telur sveitarstjórn að nýta megi hluta af arði Landsvirkjunar sem framlag til niðurgreiðslu raforkuverðs.
Auka þarf jöfnunarframlag
Rakið er í bókuninni að frá því skipulagsbreytingar voru gerðar á raforkukerfinu á árinu 2005 hafi fyrirtæki sem annast raforkudreifingu haft tvær mismunandi gjaldskrár; aðra fyrir dreifingu raforku í þéttbýli og hina fyrir dreifbýli. Þrátt fyrir niðurgreiðslu frá ríkinu sé raforkuverð í dreifbýli enn hærra en í þéttbýli. Til að ná fullri jöfnun fyrir alla landsmenn þurfi að auka um 900 milljónir kr. jöfnunarframlag sem lagt er á almenna raforkunotkun.Bent er á að rætt hafi verið um það að þegar skuldir Landsvirkjunar verði greiddar upp muni arður af henni nýtast í þágu landsmanna. „Það liggur beinast við að sá arður verði nýttur á sviði raforkumála og beinlínis í þágu landsbyggðarinnar, þar sem allar virkjanir Landsvirkjunar standa. Tímabært er að íbúar hinna dreifðu byggða sitji við sama borð og íbúar í þéttbýli hvað varðar raforkuverð og í raun hálfhjákátlegt að þeir sem búa næst uppsprettu raforkunnar, nærri virkjunum eða undir raflínum sem flytja orkuna á suðvesturhornið, skuli greiða hærra verð fyrir orkuna en þeir sem fjær búa.“ helgi@mbl.is
Til baka
Leita í greinasafni
Prenta grein
