Ísland er ekki á útleið

Krefjandi verkefni bíða Björns Víglundssonar í nýju starfi sem framkvæmdastjóri Iceland Travel og viðeigandi að hann sé vanur að hlaða rafhlöðurnar með fjallahjóla- og skíðaferðum um íslenska náttúru.

Hverjar eru helstu áskoranirnar í rekstrinum þessi misserin?

Það ekkert leyndarmál að greinin er að ganga í gegnum ákveðna aðlögun eftir mörg ótrúleg vaxtarár. Ísland sem áfangastaður er þó ekki á neinni útleið, að mínu mati. Við bjóðum gestum okkar upp á ótrúlega lífsreynslu og ánægja ferðalanga með heimsókn sína til Íslands er mjög mikil. Ég er því mjög bjartsýnn á að okkur takist að endurskipuleggja okkur á næstu mánuðum og misserum og þannig mun ferðaþjónustan áfram verða einn mikilvægasti hornsteinninn í efnahagslegu tilliti.

Hvaða bók hefur haft mest

áhrif á hvernig þú starfar?

Ég man ekki til þess að nein ein bók hafi haft afgerandi áhrif á það hvernig ég starfa. En ég tek þó alltaf eitthvað með mér úr hverju sem ég les. Ætli ég hafi þó ekki nýtt mest bókina The four disciplines of execution eftir Covey, Huling og McChesney. Hún hefur kennt mér ágætlega að einfalda markmiðasetningu og mæla árangur.

Hvaða kosti og galla sérðu

við rekstrarumhverfið?

Íslendingar eru frábærir í að takast á við breytingar í rekstrarumhverfi, það höfum við margoft sýnt. Ferðaþjónustan fann vel fyrir því á uppgangstíma og nú tökumst við á við breytingar í hina áttina. Ég held að aðlögunarhæfni fólksins okkar sé því á meðal okkar helstu kosta.

Gallarnir eru auðvitað einnig til staðar. Stærsta áskorunin er og verður, að mínu mati, að takast á við breytingar gjaldmiðilsins gagnvart helstu viðskiptalöndum.

Hvað gerirðu til að fá

orku og innblástur í starfi?

Fjölbreytt hreyfing er auðvitað frábær hvíld frá daglegum önnum. Sú hreyfing sem ég stunda kallar oft á smá ferðalög og því fæst innblástur í starfið auðveldlega í tengslum við áhugamálin. Að hjóla á fjallahjóli í Landmannalaugum er t.d. ágætis leið til þess að fá innblástur.

Hvaða lögum myndirðu breyta ef þú værir einráður í einn dag?

Ég hef þá almennu trú að draga eigi úr flækjustigi hins opinbera og einfalda laga- og regluverk eins og kostur er. Hvað ferðaþjónstuna varðar myndi ég vilja tryggja það að allir sem hafa atvinnu af ferðaþjónustu, hvort sem við erum að tala um innlend eða erlend fyrirtæki, sitji við sama borð. Það gengur einfaldlega ekki að erlend fyrirtæki komist upp með að stunda hér rekstur án þess að búa við sömu leikreglur t.d. hvað varðar skattskil og önnur vinnumarkaðsmál.