Aragrúi nýrra og spennandi tækifæra

Stærsta sjávarútvegssýning heims, Seafood Global, fór fram í Brussel í síðasta mánuði. Fjöldi íslenskra fyrirtækja var samankominn í Belgíu, en ríflega 30 þúsund gestir víðsvegar að úr heiminum sóttu sýninguna. Þórunn Inga Ingjaldsdóttir, markaðsstjóri Samskipa, var ein fjölmargra Íslendinga á svæðinu en hún var að sækja sína fyrstu sjávarútvegssýningu. Að hennar sögn er mikil upplifun að taka þátt í sýningu sem þessari.

„Þegar maður kemur í fyrsta skipti á svona sýningu kynnist maður geiranum mjög vel og það er ótrúlega skemmtilegt. Maður sér bæði íslensku viðskiptavini okkar og hvernig þeir koma sínum vörum á framfæri og þann metnað sem þeir hafa. Maður sér einnig samkeppnina og kynnist öðru sem er í gangi. Það var líka mjög áhugavert að sjá hvað það er mikil þróun í gangi í fiskvinnsluvélum og mikill spenningur fyrir þeim geira almennt.“

Vettvangur til góðra verka

Spurð um mikilvægi sjávarútvegssýninga fyrir fjölþátta flutningafyrirtæki á borð við Samskip segir Þórunn Inga það vera mikið. Þá sé sýningin góður vettvangur til að styrkja tengsl við núverandi viðskiptavini auk þess að leita uppi ný tækifæri. „Samskip fara fyrst og fremst á þessa sýningu til að hitta núverandi viðskiptavini og finna ný tækifæri. Við vorum 37 sem unnum á básnum hjá Samskipum og komum alls staðar að úr heiminum. Í sumum tilfellum erum við að reyna að auka þjónustu okkar og viðskipti en það er jafnframt mikill straumur fólks á básinn sem er að skoða hvað við getum gert fyrir þau,“ segir Þórunn Inga og bætir við að mikið hafi verið lagt upp úr því að hafa bás fyrirtækisins á sýningunni sem bestan. Þess utan hafi áhersla verið lögð á að vera með starfsfólk með sérþekkingu á hinum ýmsu sviðum.

Fjöldi erlendra starfsmanna

Til að veita sem besta þjónustu hafi fyrirtækið m.a. kallað til starfsmenn erlendis frá. „Við vorum með 37 sérfræðinga í básnum okkar sem kynntu ýmsar tegundir þeirrar þjónustu sem við bjóðum upp á. Þeir voru frá ýmsum löndum en við vorum til dæmis með starfsmenn frá Póllandi, Noregi, Víetnam og Kambódíu svo dæmi séu tekin,“ segir Þórunn Inga.

Á sýningunni í ár kynntu Samskip nýja siglingarleið fyrir Ísland og var vel tekið í slíkar hugmyndir. Að sögn Þórunnar Ingu ríkti mikil spenna meðal viðstaddra fyrir nýjum vörum auk þess sem reynt hafi verið að beina athygli að aukinni sjálfbærni innan sjávarútvegsgeirans. Til marks um það megi benda á bása Marels og Völku.

„Bás Samskipa var við hlið Marels og Völku, fyrirtækja sem eru mjög framarlega í þróun tækni sem stuðlar að sjálfbærni í fiskvinnslu og vélvæðingu. Sjávarútvegur einblínir mikið á að draga úr sóun og nýta hráefni betur og það er stanslaust verið að vinna í þá átt. Það er auðvitað mjög jákvætt að sjá afrakstur slíkrar vinnu,“ segir Þórunn Inga sem kveðst hafa viljað sjá aukna áherslu lagða á umhverfismál á sýningunni.

Umhverfið verði sett í forgang

„Ég tel að við eigum mikið inni þarna því á vettvangi þeirra sem halda sýninguna er ljóst að umhverfismál eru almennt ekki í forgangi en íslenskur sjávarútvegur er hinsvegar mjög ábyrgur og á samleið með okkur í sínum forgangi á umhverfismál. Það kemur dálítið á óvart að vera stödd í Brussel og sjá ekki meiri áherslu þar á umhverfismálin,“ segir Þórunn Inga.

Að hennar sögn hafa umhverfismál fengið aukna athygli forsvarsmanna Samskipa. Fyrirtækið hafi af þeim sökum unnið ötullega að því að breikka úrval slíkra lausna til viðskiptavina. „Samskip hafa náttúrulega einstaka stöðu sem hentar vel þeirri vinnu sem sjávarútvegfyrirtækin eru í. Í því samhengi er ég að tala um visthæfni Samskipa og fjölþátta flutningakerfi sem býður lausnir til að lágmarka kolefnisfótspor fyrirtækjanna. Á það er vaxandi þrýstingur, til að mynda á mörkuðum erlendis,“ segir Þórunn Inga.