Það var engin lygi að liðið var í draumastöðu fyrir leikinn, enda mátti Ísland tapa með 19 stigum en samt vinna riðilinn sinn í forkeppni EM. Sviss er ekki hátt skrifuð þjóð í körfuboltaheiminum en tókst engu að síður að vinna 24 stiga sigur, skora miklu meira en það hefur gert í landsleik í mörg ár og útiloka alla möguleika Íslands á að komast á næsta stórmót.
Þessi leikur var algjört skólabókardæmi um það hversu mikilvæg andlega hliðin er í íþróttunum. Undirbúningurinn fyrir leikinn var eflaust óhjákvæmilega öðruvísi en venjulega, þar sem menn hafa vitað af þessari líflínu að mega tapa með 19 stigum. En svo þegar átti að treysta alfarið á hana þá að sjálfsögðu slitnaði línan og menn lentu harkalega á jörðinni. Hausinn var bara ekki á réttum stað.
Þó að það hafi verið nógu ömurlegt að tapa svona er framhaldið ekki síður slæmt. Lokakeppni EM fer fram 2021 og Ísland verður ekki með í undankeppninni. Fær liðið þá einhvern alvöru landsleik næstu tvö árin eða svo?
Svo er það peningahliðin. Þetta mun eflaust hafa neikvæð áhrif á rekstur KKÍ, sem eins og mörg önnur sérsambönd hér heima treystir á allar krónur sem berast í kassann. Þegar Ísland verður svo ekki með í heilli undankeppni hlýtur það að koma niður á framlagi til sambandsins.
En það er best að spyrna sér frá botninum. Vonandi er þetta bara lítið bakslag fyrir íslenskan körfubolta á alþjóðavísu.