Guðný Sigríður Arnbergsdóttir, kaupmaður í Hafnarfirði, fæddist 14. júní 1936 á Borgarfirði eystra. Hún lést 9. ágúst 2019 á Landspítalanum í Fossvogi.

Foreldrar hennar voru Jóna Stefanía Ágústsdóttir, f. 24.11. 1915, d. 25.6. 1986, og Arnbergur Gíslason, f. 25.1. 1905, d. 30.4. 1997. Guðný var elst sjö systkina, hin eru: Margrét Lilja, f. 1939, Grétar, f. 1942, Gísli, f. 1946, Jóhanna, f. 1947, Friðbjörg Ósk, f. 1954, og Rúnar Ágúst, f. 1959, d. 2001.

Guðný ólst upp á Borgarfirði eystra en fór ung að aldri til Reykjavíkur og síðar Hafnarfjarðar. Hún giftist eiginmanni sínum, Ægi B.B. Bessasyni, f. 15.11. 1935, d. 17.2. 2018, hinn 26. ágúst 1962. Þau bjuggu lengst af í Hafnarfirði. Þau eignuðust fimm dætur: Stefaníu, f. 1963, Lilju, f. 1965, Írisi, f. 1968, Ragnhildi, f. 1976, og Ingveldi, f. 1978. Guðný skilur eftir sig 15 barnabörn og fimm barnabarnabörn.

Guðný rak ásamt eiginmanni sínum verslanir og heildsölu í Hafnarfirði: Norís, Radíóval, Val, Bombey, Amor, Kertaheim og Heilsubúðina.

Útför Guðnýjar fer fram frá Hafnarfjarðarkirkju í dag, 26. ágúst 2019, klukkan 13.

Með mikla sorg í hjarta minnist ég elsku mömmu minnar.

Mamma var mikill karakter sem heillaði fólk með brosi sínu og sjarma.

Endalausar minningar hellast yfir mig allt frá því þegar ég var lítil stelpa að hlusta á sögur af álfum og huldufólki og ævintýrunum frá æskuslóðum hennar. Það hafði mikil áhrif á mig sem barn og ég fyllist enn lotningu þegar ég hugsa eða fer til Borgarfjarðar eystri. Minnisstætt er þegar við æddum af stað í fjögurra daga berjamó á æskuslóðir þínar með fullt af plastfötum og ekkert meira, þú vildi fara strax, þú varst alltaf að flýta þér.

Kvöldsins sem þú hittir æskuvinkonuna þína minnist ég með brosi á vör, hlustandi á ykkur flissa eins og smástelpur yfir prakkarastrikunum sem þið frömduð. Er þakklát fyrir það og allar hinar óteljandi minningar sem ég á.

Ég minnist þín, mamma, sem kjarnakonu, handavinnumeistara, mikils frumkvöðuls, garðyrkjumeistara, heilara og ótrúlega duglegrar konu með hjarta úr gulli.

Ég er þakklát fyrir allt sem þú kenndir mér í lífinu, mamma mín, það lifir í hjarta mínu.

Það er huggandi að hugsa til þess að núna ertu sameinuð pabba á ný og í huganum sé ég ykkur dansa saman í blómagarðinum ykkar umvafin rósum í litla húsinu ykkar í sumarlandinu.

Hvíldu í friði, elsku mamma mín.

Hún var einstök perla.

Afar fágæt perla,

skreytt fegurstu gimsteinum

sem glitraði á

og gerðu líf samferðamanna hennar

innihaldsríkara og fegurra.

Fáar perlur eru svo ríkulega búnar,

gæddar svo mörgum af dýrmætustu

gjöfum Guðs.

Hún hafði ásjónu engils

sem frá stafaði ilmur

umhyggju og vináttu,

ástar og kærleika.

Hún var farvegur kærleika Guðs,

kærleika sem ekki krafðist

endurgjalds.

Hún var vitnisburður

um bestu gjafir Guðs,

trúna, vonina, kærleikann og lífið.

Blessuð sé minning einstakrar perlu.

(Sigurbjörn Þorkelsson)

Þín dóttir

Lilja.

Það getur orðið snúið að ætla sér að skrifa stuttan pistil um stóran karakter, en þannig verður þessi minningarpistill um elskulegu mömmu mína. Mamma var svo sannarlega mikill karakter. Ekki bara það, heldur var hún harðdugleg og samviskusöm. Hvort sem það var í sínum eigin búðarrekstri sem spannaði yfir 50 ár, eða að reka stórt heimili með okkur systrum innanborðs í samvinnu við pabba heitinn. Glysgjörn, skrautleg og litrík. Enda elskaði mamma jólin. Skreytt þannig að heimilið glampaði eins og blikkandi regnbogi hvort sem það var innanhúss eða utan og trénu hent upp helst í byrjun desember. Og að sjálfsögðu skreytt svo mikið að liturinn á trénu sást ekki í gegn. Mamma var með eindæmum gjafmild líka og á þessum árstíma naut hún þess að gleðja aðra. Þeir voru ófáir bíltúrarnir í aðventunni sem farnir voru í pakkaúthlutun. Fastakúnnar, kunningjar og þeir sem hana langaði bara að gleðja. Já, hún var miklu sælli í því að gefa en þiggja. Mamma naut þess að vera í kringum fólk og fólk naut þess að vera í kringum hana. Næm með eindæmum og kunni að lesa fólk og það sem er, kunni að hlusta og skilja. Mamma talaði líka við blómin sín og allar plönturnar sem hún ræktaði af mikilli ástríðu með pabba í skrúðgarðinum heima. Náttúrubarn sem naut hvort sem var að planta blómum, reyta arfa, stúdera steina eða tína bláber í sumarlok. Minningarnar eru svo ótalmargar um hreina og beina magnaða konu. Takk fyrir samfylgdina í gegnum lífið, elsku mamma mín.

Þó að kali heitur hver,

hylji dali jökull ber,

steinar tali og allt hvað er,

aldrei skal ég gleyma þér.

(Vatnsenda-Rósa)

Þín dóttir,

Ragnhildur Ægisdóttir.

Elsku besta mamma mín. Að skrifa þessi orð fyllir hjarta mitt sorg, en ég veit að þér líður vel í sumarlandinu með elsku pabba. Minningarnar sem koma upp í hugann eru svo margar og þá einna helst öll árin sem við unnum saman í Heilsubúðinni í Hafnarfirði. Það var dýrmætur tími. Þú varst góðhjörtuð og máttir ekkert aumt sjá. Þú varst handavinnusnillingur og dugnaðarforkur, enda á harðahlaupum allt þitt líf. Ef þú varst ekki að vinna þá varstu úti að hugsa um fallega skrúðgarðinn þinn. Elsku mamma mín, ég veit að þið pabbi vakið yfir okkur og gefið okkur styrk á þessum erfiðu tímum.

Elsku mamma, ég kveð þig að sinni.

Þín dóttir,

Íris Ægisdóttir.

Þrátt fyrir að dauðinn sé sorglegur, sársaukafullur og stundum ljótur gleðst ég yfir því, elsku amma mín, að þú ert nú með ástvinum þínum. Ég gleðst yfir því að vita að þú munt nú fylgjast með okkur og leiðbeina okkur hér á jarðríki ásamt afa, látnum vandamönnum, góðum öndum og Guði. Ég gleðst yfir því að nú get ég beðið til þín, og að nú séu engir tungumálaörðugleikar á milli okkar. Ég gleðst yfir því að nú getur þú fylgst með mér og því sem ég geri og að fjarlægðin á milli okkar standi ekki í vegi fyrir því. Ég gleðst yfir því að þú ert nú á fallegum stað, þar sem er gnótt fallegra blóma og blómálfa, líkt og var í garðinum þínum á Þrúðvanginum. Ég gleðst yfir því að þú hefur sameinast í sumarlandinu ættingjum þínum og afa, sem ég veit þú saknaðir mjög. Ég gleðst yfir því, að hvar sem þú ert á himnum þá ertu alltaf með okkur. Amma mín, ég elska þig. Hvíl í friði í himnaríki.

Lilja Björk

Dennisdóttir,

Muncie Indiana BNA.

Það er komið kvöld og hér sit ég og reyni að pára á blað minningar um elsku móður mína sem lést hinn 9. ágúst síðastliðinn. Það er margs að minnast frá þeim 56 árum sem við áttum saman, en samt er svo erfitt að koma hugsunum niður á blað. Orð þjóta um hugann en staldra ekki við. Orð eins og blómadýrð, fórnfýsi, gjafmildi, vinnusemi, seiðkona, hvatvísi, glysgirni, litadýrð, norn, hannyrðir, útsaumur, hreinskilni, traust, góðsemi, viska og dýpt. Já, mamma mín var einstök og ég er þakklát fyrir að hafa átt hana og hafa valið hana sem móður. Ég er þakklát fyrir að hafa átt með henni góðar stundir síðustu 56 ár og sérstaklega nýliðið sumar á Þrúðvanginum. Ég kveð elsku mömmu mína að sinni með þessum orðum:

Hér við skiljumst

og hittast munum

á feginsdegi fira;

drottinn minn

gefi dauðum ró,

hinum líkn, er lifa.

(Úr Sólarljóðum)

Stefanía Ægisdóttir.

Elsku besta mamma mín, nú er komið að kveðjustund og mun ég sakna þín sárt. Þú varst mín fyrirmynd og svo einstaklega dugleg og sterk kona. Minningarnar eru margar og mun ég varðveita þær í hjarta mínu. Ég mun með miklu stolti segja börnunum mínum frá dugnaðarkonunni sem amma þeirra var.

Það gefur mér huggun í sorginni að vita að nú eruð þið pabbi sameinuð á ný og gerið það sem þið voruð búin að ákveða í Sumarlandinu ykkar fagra; að rækta rósir og fallegan garð.

Ó, mamma mín, nú leiðir skilja að sinni,

og sorgartárin falla mér á kinn,

en hlýjan mild af heitri ástúð þinni,

hún mýkir harm og sefar söknuðinn.

Í mínum huga mynd þín skærast ljómar,

og minningin í sálu fegurst ómar.

Þú móðir kær þér aldrei skal ég gleyma,

þinn andi fylgi mér á lífsins strönd.

Ég vil í hjarta heilræðin þín geyma

og halda fast í Drottins styrku hönd.

Með huga klökkum kveð ég góða móður.

Ó, mamma mín, þú lífs míns stærsti sjóður.

(Árni Gunnlaugsson)

Takk fyrir lífið og samveruna, elsku mamma mín.

Þín dóttir,

Ingveldur.

Elsku amma mín. Ef ég er beðin að lýsa þér þá kemur fyrst upp í hugann hvað þú varst einstök kona. Sjálfsörugg, ákveðin og flott. Ég hef alltaf sagt að ég vildi vera alveg eins og þú þegar ég væri „orðin stór“.

Við vorum góðar vinkonur. Við töluðum saman um mikið og margt og mér fannst svo gott að tala við þig. Við gátum oft hlegið saman að því hvað við vorum líkar að mörgu leyti. Við vorum með það alveg á hreinu að það fylgdi nafninu að okkur Guðnýjum finnst svo ofboðslega leiðinlegt að elda.

Mínir bestu tímar á Íslandi á sumrin voru hjá þér, úti í garði eða sitjandi með þér inni í sólstofu að spjalla og njóta. Ég er svo óendanlega þakklát fyrir að hafa fengið tækifæri til þess að vera með þér eitt sumar í viðbót núna í sumar. Þessi tími sem ég fékk með þér er ógleymanlegur.

Elsku amma mín, það gleður mig að vita af þér núna með elsku afa mínum og að þið getið verið saman að eilífu í Sumarlandinu. Elsku amma, ég þakka þér fyrir samveruna í þessu lífi og ég tel mig svo sannarlega heppna að hafa átt svo stórglæsilega konu fyrir ömmu.

Guðný Helgadóttir.