Norður-Írinn Rory McIlroy stóð uppi sem sigurvegari á Tour Championship-mótinu, lokamóti PGA-mótaraðarinnar í golfi. Hann varð þar með Fedex-stigameistari og fékk hæsta verðlaunafé í sögu mótaraðarinnar.
McIlroy spilaði lokahringinn í gær á 66 höggum eða fjórum höggum undir pari og var samtals á 18 höggum undir pari. Enginn stóðst honum snúninginn á lokahringnum og var hann fjórum höggum á undan Xander Shauffele sem varð annar og fimm höggum á undan þeim Justin Thomas og Brooks Koepka.
Keppni á þriðja hring var frestað vegna eldinga og þurfti McIlroy að spila 31 holu í gær, en það virtist ekki taka neina orku frá honum. Hann fagnaði því sigri og fékk dágóða summu í vasann eða 15 milljónir dollara, sem nemur um tveimur milljörðum króna.
McIlroy er nú eini kylfingurinn í sögunni á eftir Tiger Woods sem vinnur lokamótið tvisvar eftir að úrslitakeppnin var búin til árið 2007.
Til baka
Leita í greinasafni
Prenta grein
