Bresk kaldhæðni. S-AV
Norður | |
♠108 | |
♥G86 | |
♦– | |
♣G10987643 |
Vestur | Austur |
♠ÁK954 | ♠D763 |
♥1052 | ♥K9743 |
♦G93 | ♦1075 |
♣Á3 | ♣D |
Suður | |
♠G2 | |
♥ÁD | |
♦ÁKD8642 | |
♣K5 |
Suður spilar 7G dobluð.
„Ég, þú og kötturinn í næsta húsi hefðum öll lagt niður spaðaás,“ skrifar Brian Senior og stríðir Kit Woolsey fyrir andríkt útspil. Spilið er frá HM í Kína og hinn kaldhæðni Senior hæðist að bandarískum vinum sínum í mótsblaðinu. Í öldungadeildinni opnaði suður á sterku laufi og varð svo sagnhafi í 6♣ eftir tapaða baráttu við makker um tromplit. Horfandi á trompásinn reiknaði Woolsey ekki með slag á spaða og kom út með lúmskan laufþrist! Tólf slagir.
Ófarir Woolseys voru þó kökubiti í samanburði við hamfarir Martels og Fleishers í opna flokknum. Þar opnaði Martel á 2G, Fleisher sýndi láglit eða lágliti með 3♠ og stökk svo í 5♣ í næsta hring. Martel sagði 5♦ og Fleisher hrökklaðist í 6♣, sem Martel túlkaði sem ásasvar og keyrði í sjö. „Gott dæmi um fljúgandi mælsku beggja spilara, en á sitt hvoru tungumálinu,“ skrifar Senior og skemmtir sér konunglega.