Forsendur til að gera enn betur

KA/Þór

Kristján Jónsson

kris@mbl.is

Ásdís Sigurðardóttir, einn reyndasti leikmaður KA/Þórs, er bjartsýn fyrir veturinn í Olísdeildinni í handknattaleik eftir fínan árangur í fyrra.

„Við viljum alltaf gera betur. Við misstum Sólveigu (Láru Kristjánsdóttur) en það kemur alltaf maður í manns stað. Við fengum króatískar stelpur til okkar, markvörð og skyttu, auk þess sem það urðu þjálfaraskipti. Við höfum allt til þess að gera betur en í fyrra þótt við höfum ekki farið nógu vel af stað í deildinni. En við mættum mjög sterkum liðum í fyrstu leikjunum. Mannskapurinn og viljinn er til staðar,“ sagði Ásdís, en Sólveig Lára var næstmarkahæst hjá KA/Þór á síðasta tímabili. Martina Corkovic getur leikið allar stöðurnar fyrir utan og ætti því að reynast liðinu vel.

„Hún er ekki dæmigerð hávaxin skytta en ætti að nýtast okkur mjög vel. Þessar erlendu falla mjög vel inn í hópinn hjá okkur og eru frábærar persónur.“

Markmiðin náðust að mestu

Lið KA/Þórs hefur sótt í sig veðrið undanfarin ár. Liðið fór í undanúrslit í bikarnum árið 2018 og var þá í b-deildinni. Sem nýliði í efstu deild síðasta vetur hafnaði liðið í 5. sæti.

„Í fyrra var markmiðið að halda liðinu uppi í efstu deild og komast í bikarhelgina. Okkur gekk mjög vel og þá bættum við markmiði sem var að komast í úrslitakeppnina. Á heildina litið var árangurinn mjög góður,“ sagði Ásdís, en hún og Martha Hermannsdóttir búa að mikilli reynslu sem er dýrmæt því margar í leikmannahópnum eru ungar að árum.

„Þegar erum í stuði spilar liðið hrikalega góða vörn og við fáum helling af hraðaupphlaupum, meðal annars vegna þess að við erum með fljóta hornamenn. Sá leikstíll er mjög skemmtilegur. Leikur okkar breytist svolítið við að missa Sólveigu en við erum alltaf að verða betur samstilltar. Liðið er ungt og við þekkjumst æ betur, ekki það að við Martha séum eitthvað voðalega ungar,“ sagði Ásdís og hló.

Hefur áður unnið með Gunnari

Ásdís varð bæði Íslands- og bikarmeistari með Stjörnunni um miðjan síðasta áratug. Hún lék auk þess í Noregi og var þá einmitt undir stjórn Gunnars Líndals Sigurðarsonar sem tók við liði KA/Þórs í sumar.

„Ég spilaði hjá honum í Stryn en liðið var þá í 2. deildinni. Gunnari gekk mjög vel í Noregi og var valinn þjálfari ársins 2015.“

Heimavöllurinn hefur oft reynst KA/Þór vel og Ásdís segir starfið í kringum liðið vera gott.

„Stemningin er fín. Umgjörðin í kringum liðið er mjög góð og flott fólk sem stendur á bak við okkur í stjórninni. Við fórum til dæmis í æfingaferð til Danmerkur á undirbúningstímabilinu og var vel staðið að öllu í kringum það. Fólk mætir vel á leikina og áhorfendur styðja vel við bakið á okkur,“ sagði Ásdís Sigurðardóttir, leikmaður KA/Þórs, í samtali við Morgunblaðið í gær.