Ómar Friðriksson
omfr@mbl.is
Skólastjórnendur við grunnskóla í Reykjavík hafa að undanförnu skerpt á verkferlum í skólunum til að gæta betur að öryggi barnanna og skóla- og frístundasvið Reykjavíkurborgar er þessa dagana að safna gögnum og undirbúa tillögugerð vegna þessa.
Mikil umræða hefur orðið í framhaldi af frétt Morgunblaðsins og mbl.is í seinustu viku um atvik sem átti sér stað í Austurbæjarskóla í byrjun september. Þá fór karlmaður inn í skólann á miðjum skóladegi og plataði níu ára gamla stúlku afsíðis þar sem hann þuklaði á henni og hafði uppi kynferðislega tilburði. Stúlkan komst undan og var maðurinn handtekinn.
„Skólastjórar hafa almennt tjáð sig á þá lund að þetta hræðilega atvik hafi orðið til þess að þeir hafi skerpt á verkferlum og fundað með starfsfólki sínu til að fylgja því eftir,“ segir Helgi Grímsson, sviðsstjóri skóla- og frístundasviðs, í svari til Morgunblaðsins.
Í gulum vestum á skólalóðinni
Að hans sögn er núna verið að safna saman gögnum varðandi þetta og verða niðurstöður kynntar á fundi skóla- og frístundasviðs á þriðjudag í næstu viku. ,,Við munum svo fylgja gagnasöfnun eftir með beinni tillögugerð.“Skólarnir fara hver fyrir sig yfir þessi mál og starfsreglur hjá sér, varðandi aðgengi að skólum, að starfsmenn skólanna séu merktir o.fl. Eins og komið hefur fram hefur í kjölfar atviksins verið endurskoðað eftirlit við innganga Austurbæjarskóla og allir starfsmenn skólans eru nú merktir.
Starfsmenn fleiri skóla eru merktir á skólatíma. Guðlaug Sturlaugsdóttir, skólastjóri Árbæjarskóla, sem er einn af fjölmennustu grunnskólum borgarinnar, með um 660 nemendur, segir að í framhaldi af atvikinu í Austurbæjarskóla hafi þessi mál verið tekin til skoðunar í skólanum og skerpt á því sem þegar hefur verið gert og fylgt hefur verið í starfi skólans. „Við lokuðum engum útgöngum því það er mjög flókið, krakkar eru að koma úr íþróttum og sundi yfir allan daginn og þess vegna er ekki hægt að loka útgöngum en við merktum allt starfsfólk og við ræddum við og brýndum fyrir starfsfólki að gefa sig að öllum sem koma í húsið og athuga hvaða erindi þeir eiga,“ segir hún.
Þá var foreldrum sendur póstur þar sem minnt er á reglur skólans um að hafa samband við skrifstofuna eða tala við skólaliðana á staðnum ef þeir eiga erindi í skólann. ,,Svo eru starfsmenn alltaf í gulum vestum úti og við hnykktum á því að því væri alltaf fylgt.“