Ragnhildur Þrastardóttir
ragnhildur@mbl.is
Um þrjátíu manna hópur frá öðrum flota bandaríska sjóhersins er nú með tímabundna aðstöðu á öryggissvæðinu á Keflavíkurflugvelli.
Er hópurinn þar að æfa uppsetningu og rekstur hreyfanlegrar stjórnstöðvar.
Hópurinn kom til landsins í byrjun september og fer frá Íslandi í októbermánuði, að því er fram kemur í upplýsingum frá utanríkisráðuneytinu.
„Stjórnstöðin hefur átt í samskiptum við skip bandaríska sjóhersins sem eru á Norður-Atlantshafi við venjubundin störf. Allur kostnaður af dvöl bandaríska sjóhersins er greiddur af bandaríska ríkinu.“
Kjörið tækifæri fyrir flotann
„Ísland er mikilvægt bandaríki og staðsetning landsins í Norður-Atlantshafi er þýðingarmikil. Hún veitir okkur kjörið tækifæri til að prófa samskiptastöð okkar í fyrsta sinn,“ er haft eftir aðmírálnum Andrew Lewis, yfirmanni flotans, á vef Sjóhers Bandaríkjanna.Í frétt á vef Arctic Today segir að með þessu sé bandaríski herinn að styrkja stöðu sína á norðurslóðum.
Þar kemur einnig fram að hér séu stödd fjögur skip á vegum flotans, þar á meðal beitiskipið USS Normandy og tundurspillirinn USS Farragut.
„Þessi heræfing gæti verið enn frekar til marks um að Bandaríkin ætli sér að spila virkara hlutverk á norðurslóðum,“ segir í fréttinni.
Flotinn á sér ekkert varanlegt aðsetur í Evrópu.