Elín Magnadóttir

Elsku besta Ella okkar. Um leið og við kveðjum þig langar okkur að þakka fyrir allar góðu stundirnar á lífsleiðinni. Grunnur að vináttu okkar var lagður í Viðskiptafræðideild Háskóla Íslands þar sem við nokkrir félagar tókum okkur saman sem leshóp og sem stuðningur hvert við annað. Lesstofan í Nóatúni var valin sem samastaður okkar og þar áttum við margar gleði- og gæðastundir. Grunnur að ævilangri vináttu var lagður á þessum árum. Vorboðinn varð til. Síðan þá hafa makar bæst í hópinn og við höfum fylgt hvert öðru í gegnum lífið með gleði, virðingu og væntumþykju að leiðarljósi. Að kveðja þig er eitt það erfiðasta sem við höfum tekist á við og mikið skarð er höggvið í okkar hóp. Samverustundir okkar verða ekki fleiri að sinni en hugur okkar mun að eilífu vera hjá þér.

Í hjarta okkar hvílir þú, í hugum okkar lifir þú, í sálum okkar rennum við saman, í verki munum við framhalda umhyggju þinni fyrir fjölskyldu þinni, ættingjum og vinum.

Hvíldu í friði, elsku besta Ella okkar, og Guð veri með fjölskyldu þinni á þessum erfiðu tímum.

Þínir vinir í Vorboðanum.