Hafa ráðið 138 manns í ár

Höskuldur Daði Magnússon

hdm@mbl.is

Líftæknifyrirtækið Alvotech greindi frá því í vor að fyrirtækið ætlaði að ráða 100 vísindamenn og sérfræðinga til að taka þátt í uppbyggingu fyrirtækisins. Samkvæmt upplýsingum frá Alvotech hafa þessi áform gengið vonum framar. Alls hafa 138 vísindamenn og sérfræðingar verið ráðnir í hátæknisetur Alvotech í Vatnsmýrinni á þessu ári. Nú eru yfir 400 starfsmenn hjá fyrirtækinu á Íslandi, í Sviss og í Þýskalandi frá um 20 þjóðlöndum.

Styrkja innviði fyrirtækisins

Hildur Hörn Daðadóttir, mannauðsstjóri Alvotech, segir að vel hafi gengið að manna lausar stöður hjá fyrirtækinu. „Til að styðja við vöxt Alvotech og undirbúning fyrir markaðssetningu lyfja höfum við verið að styrkja innviði fyrirtækisins enn frekar. Það er ánægjulegt að fá til liðs við okkur svo mikið af nýjum liðsmönnum með fjölbreyttan bakgrunn. Hluti af nýráðningum eru aðilar með mikla reynslu úr lyfjaiðnaði í bland við unga og efnilega vísindamenn og sérfræðinga,“ segir Hildur Hörn en þau störf sem auglýst voru í vor sneru aðallega að fólki með háskólamenntun á sviði líf-, raun- og lyfjavísinda eða verkfræði.

Starfsemi Alvotech felst í þróun og framleiðslu líftæknilyfja sem eru notuð til meðferðar á erfiðum sjúkdómum eins og gigt, psoriasis og krabbameini. Þróunar- og framleiðslusetur fyrirtækisins á Íslandi er búið fullkomnum tækjum og búnaði og hefur fyrirtækið nú þegar fengið framleiðsluleyfi og gæðavottun. Hátæknisetrið er hluti af Vísindagörðum Háskóla Íslands í Vatnsmýrinni og er um 13 þúsund fermetrar að stærð.