Þóroddur Bjarnason
tobj@mbl.is
Össur Kristinsson stoðtækjafræðingur leiðir nú bátahönnun hjá Rafnari, fyrirtækinu sem hann stofnaði árið 2005. Bátarnir sem um ræðir eru nýir og stærri bátar sem hugsaðir eru með þarfir Slysavarnafélagsins Landsbjargar í huga. Hingað til hefur fyrirtækið þróað og selt báta sem eru 8,5 metra og 11 metra langir, og komu fyrst á markaðinn árið 2015, en þessi nýi bátur verður 14 metra langur. 8,5 metra og 11 metra bátarnir voru báðir hannaðir í nánu samstarfi við Landhelgisgæslu Íslands og Landsbjörg.
Byltingarkennd þróun
Tilgangurinn með stofnun Rafnars á sínum tíma var að þróa, framleiða og selja nýja byltingarkennda gerð báta. Um er að ræða nýja hönnun á skrokklagi hraðskreiðra báta og smærri skipa sem dregur verulega úr höggum þegar bátnum er siglt við aðstæður sem alla jafna væru taldar erfiðar eða ófærar fyrir báta með hefðbundnu skrokklagi. Haukur Alfreðsson framkvæmdastjóri fyrirtækisins segir í samtali við 200 mílur að samanburðarprófanir hafi til dæmis sýnt að skrokklagið dragi allt að 95% úr höggum, bátarnir séu hagkvæmir, minnki orkuþörf og eldsneytiseyðslu. Eins og Haukur bendir á hafa bátarnir hlotið fjölda viðurkenninga vegna sinna sérstöku eiginleika og mikillar sjóhæfni.Hann segir að unnið hafi verið markvisst að því með Landsbjörg að þróa nýja 14 metra bátinn með þessu nýja skrokklagi og í samræmi við þarfir Slysavarnafélagsins.
Segir hann að til standi á næstu árum að endurnýja allan bátaflota Landsbjargar, en félagið rekur á annan tug björgunarskipa hringinn í kringum landið. Sem dæmi segir Haukur að björgunarskipið Ásgrímur í Reykjavík sé núna um 40 ára gamalt skip en við komuna hingað til lands var skipið þá þegar nálægt því tuttugu ára gamalt. „Þetta eru góð skip, en þau eru barn síns tíma,“ segir Haukur. „Þau eru hæggeng og eiga til að þyngjast með aldri- num.“
Stóri bróðir á teikniborðinu
Aðspurður segir Haukur að ekki sé kominn á bindandi samningur við Landsbjörg um kaupin á bátunum. Landsbjörg skoði einnig skip frá öðrum framleiðendum en bátar Rafnars komi vonandi sterklega til greina til að taka við af núverandi bátaflota, enda sé um að ræða íslenska hönnun og framleiðslu.Haukur segir að byggt sé á 8,5 og 11 metra bátunum við hönnun á 14 metra bátunum fyrir Landsbjörg, en þeir séu skalaðir upp og lagaðir að þörfum Slysavarnafélagsins. „Við keyrum þrívíddarlíkan af bátnum í sífellu í fullkomnu hermilíkani og þannig náum við sífellt betri árangri hvað varðar, eiginleika og orkuþörf bátanna, til dæmis.“
Aðspurður segir Haukur að nýi báturinn verði sá stærsti sem fyrirtækið hefur sett í fjöldaframleiðslu. „Við höfum áður sérsmíðað einn bát sem er 15 metra langur. Svo erum við með stóra bróður á teikniborðinu, 17 metra langan bát, en í honum geta verið rúmgóðar káetur, þannig að skipverjar geta búið um borð.“
Eins og sagt var frá í Morgunblaðinu í nóvember sl. seldi fyrirtækið nýlega 10 báta af gerðinni Rafnar 1100, sem eru 11 metra langir bátar, til grísku strandgæslunnar og samtaka grískra skipaeigenda. Byrjað verður að afhenda þá báta á næsta ári að sögn Hauks. Þá er Landhelgisgæsla Íslands með bæði 8,5 metra bát og 11 metra bát í notkun. Ennfremur er Hjálparsveit skáta í Kópavogi með 11 metra bát í notkun og sömuleiðis Björgunarsveitin Geisli á Fáskrúðsfirði með einn 11 metra bát. Þá hafa nokkrir bátar Rafnars verið seldir til einkaaðila, t.d. í Norður-Skotlandi og víðar um heiminn. Báturinn í Skotlandi hefur reynst sérstaklega vel, að sögn Hauks. Hann hefur það verkefni meðal annars að ferja fólk á milli skoskrar eyjar og meginlandsins.
Til baka
Leita í greinasafni
Prenta grein
