Baldur Arnarson
baldura@mbl.is
Atvinnuleysi meðal erlendra ríkisborgara jókst mun meira í fyrra en meðal íslenskra ríkisborgara. Jafnframt jókst það fyrr meðal erlendra ríkisborgara. Er atvinnuleysi í prósentustigum meðal erlendra ríkisborgara nú álíka mikið og 2013. Þetta má lesa úr greiningu Analytica á tölum VMST og Hagstofunnar.
Yngvi Harðarson, hagfræðingur og framkvæmdastjóri Analytica, segir athyglisvert að atvinnuleysi meðal erlendra ríkisborgara hafi aukist meira í prósentustigum talið en meðal íslenskra ríkisborgara. Ein skýringin kunni að vera brottflutningur íslenskra ríkisborgara.
Eykst jafnan á undan
Athyglisvert sé að atvinnuleysi meðal erlendra ríkisborgara virðist hafa tilhneigingu til að aukast áður en það eykst meðal Íslendinga.„Þannig gæti verið unnt að álykta um ókomið atvinnuleysi meðal Íslendinga á grunni upplýsinga um breytingar á atvinnuleysi erlendra ríkisborgara,“ segir Yngvi.
Þá hafi atvinnuleysi erlendra ríkisborgara verið meira en meðal íslenskra ríkisborgara í uppsveiflunni. Munurinn hafi hins vegar verið orðinn lítill í ársbyrjun 2017 þegar erlent verkafólk missti vinnu í sjómannaverkfallinu. Síðan hafi fleiri erlendir ríkisborgarar en íslenskir misst vinnu í niðursveiflunni. Um 7.600 manns voru án vinnu í nóv. sl., þar af 3.300 erlendir ríkisborgarar.