Helgi Bjarnason
helgi@mbl.is
Á sjötta tug bænda hefur sýnt áhuga á að taka þátt í samningum Búnaðarsambands Eyjafjarðar um kaup á vararafstöðvum. Eru þetta mest bændur í Eyjafirði og annars staðar á Norðurlandi en einnig einstaka bændur annars staðar.
Hugmyndin að samkaupum á vararafstöðvum kom upp hjá Búnaðarsambandinu eftir veðurhaminn í desember sem hafði í för með sér langvarandi rafmagnsleysi á fjölda bæja með tilheyrandi óþægindum fyrir fólkið og tilfinnanlegu afurðatjóni á kúabúum.
Sigurgeir B. Hreinsson, framkvæmdastjóri Búnaðarsambandsins, segir að afhending rafmagns sé misörugg eftir svæðum. Víða hafi verið stöðugt rafmagn í áratugi, aðeins komið straumleysi í stuttan tíma og því hafi menn talið sig nokkuð örugga.
Nú segi margir að þeir ætli ekki að lenda í þessum hremmingum aftur og kaupa vararafstöðvar, jafnvel þótt þeir þurfi ekki að nota þær í 20 ár.
Sigurgeir segir að rafmagnsleysi geti orðið af öðrum ástæðum en óveðri. Segist sjálfur líta þannig á að alveg eins geti komið til straumleysis vegna afleiðinga eldgosa.
Misjafnar þarfir
Tilgangur Búnaðarsambandsins með vinnunni er að reyna að ná niður verði á þessum tækjum með magnkaupum.Bændur sem hafa skráð sig á lista Búnaðarsambandsins hafa misjafnar þarfir. Algengt er að menn vilji kaupa 40-50 kílóvatta rafal sem hægt er að knýja með dráttarvél. Aðrir vilja hafa sjálfstæða vararafstöð. Þá eru menn með misjafnar óskir um stærðir.
Sigurgeir hefur fengið tæknimenn til liðs við sig og er verið að undirbúa verðkönnun hjá seljendum vararafstöðva.
Til baka
Leita í greinasafni
Prenta grein
