Höskuldur Daði Magnússon
hdm@mbl.is
Afar brýnt er að endurskoða heimildir einstaklinga til innflutnings á ávana- og fíknilyfjum og sterum til eigin nota, að mati tollgæslustjóra. Vill tollgæslustjóri þrengja umræddar heimildir verulega í ljósi mála sem hafa komið upp undanfarin ár og hefur lagt fram tillögur þess efnis til heilbrigðisráðherra. Í umsögn sinni um ný lyfjalög, sem undirrituð er af Hjalta B. Árnasyni lögfræðingi, gagnrýnir tollgæslustjóri að lítið sé vikið að reglum um þetta.
Grunsamlegar ávísanir lækna
Ný lyfjalög eru nú í meðförum Alþingis og hefur verið kallað eftir umsögnum víða að. Ætlunin er að breyta regluverki lyfjamála hér á landi, meðal annars vegna breytinga á íslensku heilbrigðiskerfi og ýmissa tilskipana og reglugerða frá ESB sem tekið hafa gildi vegna aðildar Íslands að EES-samningnum. Gert er ráð fyrir að lyfjagreiðslunefnd verði lögð niður og verkefni hennar flutt til Lyfjastofnunar og Landspítala, svo dæmi séu tekin.Í umsögn tollgæslustjóra er ennfremur getið að skynsamlegt væri að tollayfirvöldum verði heimilt að upplýsa Lyfjastofnun eða Embætti landlæknis um grunsamlega lyfjaávísun lækna í málum þar sem grunur leikur á að brotið sé gegn núverandi reglugerð um innflutning einstaklinga á lyfjum til eigin nota. Upp hafi komið tilvik þar sem grunur leikur á að einstaka læknar hafi útvegað fólki síðbúið vottorð eða lyfseðil fyrir slíkan innflutning.