Framleiðendur sótthreinsiefna hafa sumir séð ástæðu til að senda út tilkynningu vegna ummæla forseta Bandaríkjanna þar sem hann velti því upp hvort kanna ætti möguleika á því að dæla sótthreinsivökva inn í líkama fólks sem nokkurs konar meðferð við kórónuveirunni. Einn þeirra er Dettol á Bretlandi.
„Sem leiðandi fyrirtæki á heimsvísu í framleiðslu á heilsu- og hreinlætisvörum viljum við taka skýrt fram að ekki má innbyrða vörur okkar undir neinum kringumstæðum,“ segir þar og var fólki um leið bent á að lesa vel fylgiseðla efnanna.
Fjölmiðlar í Bandaríkjunum, sem og annars staðar, hafa fjallað um þessa hugmynd forsetans. Í viðtali við CNN segir Leana Wen bráðalæknir það vera vafasamt að kasta fram slíkum hugmyndum, enda sé forsetinn fyrirmynd margra þar vestanhafs.
„Ég vona virkilega að enginn hafi hlustað á það sem hann sagði og velti því nú fyrir sér hvort vert væri að prófa þetta í heimahúsi,“ sagði hún og bætti við: „Ekki prófa þetta og fylgið ráðleggingum frá læknum og smitsjúkdómastofnunum.“