Guðmundur Franklín Jónsson, viðskipta- og hagfræðingur, og Guðni Th. Jóhannesson, forseti Íslands, hafa skilað meðmælendalistum vegna framboðs til embættis forseta Íslands í öllum kjördæmum landsins. Yfirkjörstjórnir yfirfara listana.
Frambjóðendur þurfa að skila framboðum til dómsmálaráðuneytisins eigi síðar en á morgun, föstudag. Framboði skal fylgja samþykki forsetaefnis, nægilegur fjöldi meðmælenda og vottorð yfirkjörstjórna um að meðmælendur séu kosningabærir. Ráðuneytið auglýsir eigi síðar en föstudaginn 29. maí hverjir verða í kjöri.
Forsetakosningar verða laugardaginn 27. júní, ef fleiri en eitt gilt framboð berast.