Trausti Þór Stefánsson

Trausti Þór Stefánsson hóf störf hjá Aðföngum árið 2003 og reyndist strax góður vinnufélagi og vinur okkar allra sem með honum unnum. Trausti var, eins og nafnið gefur til kynna, traustur og góður starfsmaður sem gat gengið í öll þau störf sem honum voru falin. Meðal annars sá hann um tíma um ráðningar starfsmanna í vöruhúsi. Undanfarin ár starfaði Trausti sem móttökubókari í vöruhúsi Aðfanga, allt þar til hann fór í veikindaleyfi síðastliðið vor.

Síðustu þrjú árin fylgdumst við með Trausta takast á við veikindin með æðruleysi og jákvæðni að vopni. Hann heimsótti okkur reglulega og hélt góðu sambandi við okkur, enda átti Trausti marga vini í Aðföngum. Alltaf var stutt í grínið hjá Trausta, hann var hjálpsamur og alltaf tilbúinn til þess að leiðbeina með hvað sem er.

Meðal annars um hótel og veitingastaði erlendis, ábendingar sem reynst hafa mörgum okkar vel. Trausti hafði gaman af því að ferðast, helst án þess að ákveða of mikið fyrir fram hvert leiðin lægi. Hann vildi geta hoppað með litlum fyrirvara í ævintýraferð, dottið inn á tónleika eða farið á skemmtileg leikrit á ferðum sínum. Trausti heimsótti okkur síðast núna í sumar þegar hann kom hjólandi til okkar úr Kópavoginum og við glöddumst með honum að þrek hans hefði aukist þannig að hann gæti verið úti og notið sín.