Samkomulag hefur náðst í viðræðum ríkisins og sveitarfélaga um fjármálaleg samskipti sem staðið hafa yfir að undanförnu. Var það undirritað í fjármálaráðuneytinu síðdegis í gær. Trúnaður ríkir um efni þess þar til fjármála- og efnahagsráðherra kynnir fjárlagafrumvarp næsta árs og nýja ríkisfjármálaáætlun í dag. Þá verður samkomulagið og erfið staða sveitarfélaganna í brennidepli á tveggja daga fjármálaráðstefnu sveitarfélaga, sem hefst í dag.
Fram hefur komið að mikil umskipti til hins verra hafa orðið í rekstri sveitarfélaga og mikið tekjufall blasir við. Frávik í rekstri sveitarfélaga frá áætlunum líðandi árs námu í ágústlok alls 33 milljörðum kr.
Fjármálaráðstefnan verður haldin með breyttu sniði og fer fram á netinu vegna kórónuveirufaraldursins. Hún hefst á hefðbundinn hátt með ávörpum. Haldnir verða nokkrir örfundir og verða fundir sendir út í gegnum fjarfundaforrit á netinu. Nokkrir örfundir verða svo á föstudögum í október um þematengd málefni.
Til baka
Leita í greinasafni
Prenta grein
