Verulega hefur dregið úr kostnaði Alþingis vegna utanlandsferða þingmanna vegna heimsfaraldurs kórónuveirunnar.
Ferðakostnaður utanlands fyrstu átta mánuði ársins 2020 er 10,5 milljónir króna en var á sama tíma í fyrra 25,3 milljónir, samkvæmt upplýsingum frá Alþingi.
Forsætisnefnd þingsins ákvað í mars að fella niður vinnutengdar ferðir þingmanna og starfsfólks Alþingis frá og með 17. mars út vorþingið. Sú ákvörðun hefur ekki verið framlengd, enda hefðbundinni þátttöku í alþjóðastarfi sjálfhætt þegar þingmannafundir og -ráðstefnur hafa færst í rafrænt form að frumkvæði skipuleggjenda.
Á vef Alþingis má sjá tikynningar um þrjá fjarfundi í næstu viku. Birgir Þórarinsson, Rósa Björk Brynjólfsdóttir og Þórhildur Sunna Ævarsdóttir taka þátt í fjarfundi eftirlitsnefndar Evrópuráðsþingsins 5. október. Sigríður Á. Andersen tekur þátt í fjarfundi 12+ landfræðihóps hjá Alþjóðaþingmannasambandinu 6. október og Njáll Trausti Friðbertsson og Þorgerður K. Gunnarsdóttir taka þátt í fjarfundi á vegum NATO-þingsins um áherslur bandalagsins til 2030 hinn 7. október. sisi@mbl.is