Besti samningurinn.

Besti samningurinn. N-Allir

Norður
♠K2
♥ÁK863
♦652
♣KD8

Vestur Austur
♠D6 ♠G10873
♥1097 ♥DG42
♦9743 ♦8
♣Á1097 ♣642

Suður
♠Á954
♥5
♦ÁKDG10
♣G53

Suður spilar 6♦.

Þeir sögðu vel á spilin sín, Icebaldi (Jón Baldursson) og Einarusa (Einar Guðjohnsen), í viðureign við Íra í síðasta netmóti. Jón opnaði á grandi í norður (15-17), Einar spurði um háliti með 2♣, fékk svar á 2♥ og sýndi þá tígulinn eðlilega með 3♦. Jón sagði 3G, Einar 4G (áskorun) og Jón 6♦. Allt beint af augum í besta samning.

En besti samningur vinnst ekki alltaf. Írinn Hugh McGann kom út með laufás og spilaði laufi áfram í öðrum slag. Einar tók ÁK í trompi og staldraði við þegar legan sannaðist. Í jafnri tígullegu væri hægt að kanna hjartað með ♥ÁK og stungu, taka svo síðasta tígulinn af vörninni og trompa fimmta hjartað frítt. En 4-1-legan útilokar þessa leið og Einar reyndi í staðinn að stinga spaða í borði. Því miður – vestur átti bara tvo spaða og trompaði yfir blindum. Einn niður.