Aftur til móðurlandsins

Pólitík Synd væri að kalla Tommy Lee, trymbil Mötley Crüe, mesta aðdáanda Donalds Trumps Bandaríkjaforseta. Hann hefur ítrekað lýst andúð sinni á forsetanum á kjörtímabilinu og þegar breski miðillinn The Big Issue spurði hvað hann hygðist fyrir næði Trump endurkjöri svaraði Lee: „Lagsi, ég sver til Guðs, gerist það kem ég til Bretlands í heimsókn. Ég bíð ekki boðanna. Síðan fer ég aftur til móðurlandsins, til Grikklands, og kem mér upp húsi á einhverri eyjunni. [Hann á gríska móður og fæddist í Aþenu.] Það sem svíður sárast er að mér finnst við verða að athlægi; að Evrópa og aðrir hugsi með sér: Hvað í andskotanum eruð þið að pæla? Hættið að kjósa frægt fólk og fáið einhvern sem kann til verka til að stjórna landinu.“