Blint val. N-Allir
Norður | |
♠9753 | |
♥542 | |
♦Á8762 | |
♣8 |
Vestur | Austur |
♠ÁKD2 | ♠G10 |
♥7 | ♥ÁDG9863 |
♦G109543 | ♦-- |
♣G6 | ♣9432 |
Suður | |
♠864 | |
♥K10 | |
♦KD | |
♣ÁKD1075 |
Suður spilar 5♣ dobluð.
Brids er leikur takmarkaðra upplýsinga og þess vegna þurfa menn oft að giska – velja blint á milli freistandi kosta. Svo dæmi sé tekið: Hvort ætti austur frekar að opna á 3♥ eða fjórum? Og í framhaldi af því: Hvað á suður að gera ef austur kýs að opna á 4♥? Á hann að kæfupassa eða harka sér í 5♣?
Snillingarnir á Netbridge opnuðu flestir á 4♥. Aðeins tveir af tólf kusu 3♥ – Bauke Muller og Vinita Gupta. Suður sagði 3G og vann eftir háspaða út. Hinir tíu sem opnuðu á 4♥ tryggðu sér ýmist 620 (veik vörn) eða 1400-kall í vörn gegn 5♣ dobluðum (fjórir toppslagir og þrjár stungur).
Má draga af þessu þann lærdóm að 4♥ sé „rétt“ opnun og 5♣ „röng“ innákoma? Tæplega. Eitt dæmi nægir ekki í alhæfingu. En tölvuforrit gæti kannski gefið nákvæmt svar með því að framleiða sambærileg dæmi í miklu magni.