Tímamót Varðskipið Ægir hefur legið óhreyft við Skarfabakka síðustu ár. Eftir áramót kemur í ljós hvort raunhæf tilboð berast Ríkiskaupum.
Tímamót Varðskipið Ægir hefur legið óhreyft við Skarfabakka síðustu ár. Eftir áramót kemur í ljós hvort raunhæf tilboð berast Ríkiskaupum. — Morgunblaðið/Ómar
Höskuldur Daði Magnússon hdm@mbl.is „Það er auðvitað eftirsjá að Ægi. Þetta er stórmerkilegt skip og eitt það besta sem ég hef verið á,“ segir Halldór B. Nellett, skipherra Landhelgisgæslunnar.

Höskuldur Daði Magnússon

hdm@mbl.is

„Það er auðvitað eftirsjá að Ægi. Þetta er stórmerkilegt skip og eitt það besta sem ég hef verið á,“ segir Halldór B. Nellett, skipherra Landhelgisgæslunnar.

Auglýst var um helgina að til stæði að selja varðskipið Ægi. Skipið hefur ekki verið í notkun hjá Landhelgisgæslunni síðustu ár og liggur nú við Skarfabakka. Varðskipið Ægir hefur þjónað Landhelgisgæslunni lengi en það var smíðað í Danmörku árið 1968. Ægir átti stóran þátt í 50 og 200 mílna þorskastríðunum og var meðal annars fyrst íslenskra varðskipa til að beita togvíraklippum á landhelgisbrjót.

Halldór byrjaði á Ægi 16 ára gamall árið 1972. Hann segir synd og skömm að Ægir hafi ekki verið gerður meira út og lengur. Skipið hafi nýst vel í þorskastríðunum og bjargað óhemju mörgum skipum eftir það.

„Það er sorglegt að sjá hvernig var búið að fara fyrir þessu góða skipi. Undanfarin ár hefur mikið verið skorið niður og það er skelfilegt hvað er lítið úthald á varðskipunum. Þrátt fyrir góðæri hafa stjórnvöld ekki viljað spýta í og ég er verulega svekktur yfir því. Núna erum við með eitt varðskip á sjó, Þór eða Tý. Það er afleitt fyrir þjóð sem á allt sitt undir fiskveiðum að vera ekki með meiri björgunargetu en það. Lágmarkið er að vera með tvö skip á sjó, við erum með tvö góð skip en þetta snýst um áhafnir,“ segir Halldór sem telur löngu tímabært að huga að nýju varðskipi.

Horft til sjálfbærni

Í auglýsingu frá Ríkiskaupum kemur fram að til þess að undirbúa söluferli er gerð undanfarandi markaðskönnun sem ekki er skuldbindandi fyrir seljanda. Jafnframt fylgir sögunni að áður en tekin er ákvörðun um næstu skref í söluferlinu er óskað eftir hugmyndum um nýtingu skipsins og líklegt söluverðmæti. Áhugasömum er gefinn frestur fram til 15. janúar til að skila inn hugmyndum að nýtingu og verðhugmyndum.

„Við mat á sölu skipsins verður horft til endurnýtingar, sjálfbærni, kolefnislosunar og annarra samfélagslegra áhrifa. Áhugasömum verður gefið tækifæri til að skoða skipið að uppfylltum ákveðnum skilyrðum áður en skilafresti til að senda inn gögn lýkur ef aðstæður leyfa,“ segir Björgvin Víkingsson, forstjóri Ríkiskaupa.

Þegar hafa komið fram hugmyndir um nýtingu Ægis en starfshópur um uppbyggingu snjóflóðasafns á Flateyri hefur óskað eftir að Ísafjarðarbær finni varðskipinu stað á Flateyri og það verði nýtt undir safn sem og fyrir gisti- og veitingaþjónustu.