„Ekki fæ ég frítt í bíó út á þetta“

Áhrif Goðsögnin Steve „Lips“ Kudlow, forsprakki hins lífseiga málmbands Anvil, segir þá staðreynd að band hans hafi haft mikil áhrif á annað víðfrægt málmband, Metallica, í upphafi 9. áratugarins ekki hafa skipt miklu máli í sínu lífi til þessa. „Þegar allt kemur til alls veit ég ekki hvaða þýðingu það hefur fyrir mig,“ sagði Lips léttur í bragði í hlaðvarpsþættinum Rocking With Jam Man. „Ekki fæ ég frítt í bíó út á þetta; ekki einu sinni poppkorn eða kaffi.“ Í samtalinu kom fram að Lips lætur sig enn þá dreyma um að túra með Metallica sem væri vitaskuld hinn endanlegi þakklætisvottur af hálfu málmskrímslisins.