Tölvan þarfasti þjónninn

Steinþór Guðbjartsson

steinthor@mbl.is

Undanfarin ár hefur Sturlaugur Haraldsson verið á ferð og flugi um allan heim vegna atvinnu sinnar, en nú fer hann hvergi og sinnir starfinu frá heimili sínu á Englandi. Um þessar mundir reyndar frá Akranesi þar hann hefur verið innlyksa nokkrum sinnum vegna faraldursins, fyrst þegar ósköpin dundu yfir og aftur nú. „Ég hef verið að bíða eftir rétta tækifærinu til þess að fara aftur til Englands og hef nýtt tímann og unnið hérna á meðan,“ segir hann.

Um miðjan mars var Sturlaugur á leið frá Englandi til Bandaríkjanna með millilendingu á Íslandi. „Þegar ég ætlaði áfram vestur var öllu flugi þangað aflýst og engum hleypt inn í landið þannig að ég varð að afgreiða mín mál héðan,“ segir hann um fyrstu truflun faraldursins. Síðan hafi dregið hratt úr ferðum og hann aðeins farið á milli Íslands og Englands. „Núna hef ég beðið í nokkra daga með að fara aftur til Englands í þeirri von að sleppa við tveggja vikna sóttkví,“ segir hann.

Miklar breytingar

Fyrir skömmu tók Sturlaugur þátt í pallborðsumræðum breska netmiðilsins Undercurrent News , útbreiddasta netmiðilsins um sjávarútvegsmál, ásamt fimm öðrum sérfræðingum á mjög fjölmennri netráðstefnu um áhrif faraldursins á stöðuhorfur alaska-ufsa í heiminum á næsta ári. Hann bendir á að um 7,5 milljónir tonna veiðist af hvítfiski árlega og þar af um 3,6 milljónir tonna af alaska-ufsa, en talsverð óvissa sé um framhaldið. Mikið magn af heilfrystum alaska-ufsa hafi farið í vinnslu í Kína, en Kínverjar fari nú gaumgæfilega yfir alla fragt og finnist einhver merki um veiru á umbúðunum séu vörurnar endursendar. Mikil vinnslugeta sé í Kína og nú vanti hráefni. „Kína hefur verið „verksmiðja“ heimsins og ef fram heldur sem horfir er líklegt að vinnslan færist að einhverju leyti annað á næstu árum, meðal annars til Evrópu. Athyglisverðar breytingar gætu því verið fram undan.“

Rússneska sjávarútvegsfyrirtækið Norebo er í eigu eins manns. Það er hið öflugasta í Rússlandi með um 30% af bolfiskskvóta landsins og eitt stærsta sinnar tegundar í heiminum með samtals um 600.000 tonn af bolfiski og uppsjávarfiski upp úr sjó á ári. Sturlaugur Haraldsson hefur unnið hjá fyrirtækinu í nær 12 ár og er framkvæmdastjóri annars sölufyrirtækis samstæðunnar, Norebo Europe, stjórnar sölumálum í Evrópu, Bandaríkjunum og að hluta til í Asíu frá skrifstofu sinni rétt vestan við London. „Venjulega eru um 22 manns á skrifstofunni í Maidenhead, en nú vinna allir nema tveir til þrír heiman frá sér og það hefur gengið ótrúlega vel,“ segir Sturlaugur.

Öll samskipti, fundir, ráðstefnur og önnur samvinna, eru nánast alfarið rafræn og það er mikil breyting frá því sem áður var. „Sennilega á eftir að draga mikið úr öllum ferðalögum vegna vinnunnar,“ segir Sturlaugur. Í því sambandi nefnir hann að allir stjórnendur Norebo hafi komið saman á fundum í Rússlandi tvisvar á ári en í ár hafi þeir verið rafrænir. „Í fyrra hittust til dæmis allir framkvæmdastjórar fyrirtækisins í Petropavlovsk austast í Rússlandi og ferðalag þangað tekur bæði mikinn tíma og kostar sitt, þannig að margt sparast með því að halda rafræna fundi. Samt hlakka ég til að hitta viðskiptavini og samstarfsmenn augliti til auglitis, því þrátt fyrir að rafræn samskipti verði áfram jafnast samt ekkert á við það að hitta fólk og spjalla, það mun ekki alveg hverfa.“