Gátan er sem endranær eftir Guðmund Arnfinnsson:
Í stiga honum stend ég á.
Stykki á rokk nú finna má.
Bera dót í búð ég sá.
Baðstofuloftið nefni þá.
Hér kemur svar Þorgerðar Hafstað:
Á palli efst í stiga stendur.
Styður pallur rokksins hjól.
Pallbíl stýrir Palli kenndur.
Á palli höldum dýrleg jól.
Helgi Þorláksson á þessa lausn:
Á stigapalli pústar frú,
pall á rokki þeytti sú,
búðardóti á bílpall hlóð,
á baðstofupalli fæddist fljóð.
Guðrún B. svarar:
Ég stend með te á stigapalli.
Sterkan pall á rokki veit.
Á palli í búð stóð Bratz hjá fjalli.
Á baðstofupalli krakka leit.
Helgi R. Einarsson leysir gátuna þannig:
Pallur stiga er víst á
og á rokknum má víst sjá.
Pallur dót í búðum ber.
Baðstofan og pallur er.
Hér er lausn Hörpu á Hjarðarfelli:
Í stiga á palli stendur oft.
Stykki rokks er pallur.
Búðarpalla ber við loft.
Baðstofupallur allur.
Sjálfur skýrir Guðmundur gátuna svona:
Í stiga palli stend ég á.
Stykki á rokk er pallur sá.
Pallur búðarhilla hér.
Í húsi baðstofupallur er.
Þá er limra:
Þrenning, sem þjóðin hlýðir,
þekking og viska prýðir,
þrjú á palli
þau eru á spjalli,
Þórólfur, Alma og Víðir.
Síðan er ný gáta eftir Guðmund:
Þrösturinn hímir nú hljóður,
hlýju sér reynir að finna,
sölnaður sumarsins gróður,
en seint ætlar gátum að linna:
Mökkur úr reykháfi rýkur.
Sá rosaleg andþrengsli hefur.
Snjór, sem um foldina fýkur.
Fýr þennan sviti umvefur.
Gömul vísa í lokin:
Dustar lýs af darrastaf
dúka jörðin jörðin.
Hann má prísa héðanaf
Hornafjörðinn fjörðinn.
Halldór Blöndal
halldorblondal@siment.is