Það hefur engar afleiðingar þegar forsvarsmenn RÚV ohf. brjóta lög. Það er margsannað mál. Og það þykir heldur ekkert tiltökumál að þeir geri það þegar þekktustu og bestu rannsóknarblaðamenn landsins eiga í hlut.

Það hefur engar afleiðingar þegar forsvarsmenn RÚV ohf. brjóta lög. Það er margsannað mál. Og það þykir heldur ekkert tiltökumál að þeir geri það þegar þekktustu og bestu rannsóknarblaðamenn landsins eiga í hlut. Þeir frétta aldrei af hinum augljósu brotum og staðfestu. Þeir eru of uppteknir við að taka við verktakagreiðslum frá stofnuninni sem í hlut á.

Og þótt lögbrotin séu mörg eru þau þó aðeins toppurinn á miklu stærri ísjaka þar sem ókjörnir og umboðslausir einstaklingar fara sínu fram í skjóli RÚV sem á tyllidögum er sagt vera okkar „allra“ þótt aldrei blandist nokkrum hugur um að þar er aðeins vísað til þeirra sem eru gjaldgengir í þáttinn „flissað með frægum“ sem haldið er úti á föstudagskvöldum, að því er virðist til þess að skemmta skrattanum og drepa aðra úr leiðindum.

Eitt nýlegt dæmi er ráðning framkvæmdastjóra RÚV Sölu ehf. sem fer með alla auglýsingasölu stofnunarinnar. Lengi þráuðust forsvarsmenn RÚV við og neituðu að stofna þetta félag sem þó var lögboðin skylda. Svo þegar því var loks lokið þurfti að ráða yfir fyrirtækið framkvæmdastjóra. Og í stað þess að gera það með sómasamlegum hætti var staðan auglýst á undirvef ruv.is – og á hann fara færri en móðurvefinn sem enginn sækir. Síðan var innanbúðarmaðurinn ráðinn sem menn þorðu ekki að tefla fram gegn fólki sem slysast hefði til að sækja um ef einhver hefði vitað af ráðningarferlinu.

Annað dæmi um ruglið og fjárausturinn var vandræðalegur barlómur Illuga Jökulssonar sem fengið hefur að valsa um stofnunina eins og hann lystir síðustu áratugi – að því er virðist í þakkarskyni fyrir mikilsvert framlag hans til málefnalegrar og uppbyggilegar umræðu í landinu, jafnvel yfirvegaðrar. Rausið að þessu sinni fólst í því mikla óréttlæti sem hann taldi felast í að hann mætti ekki lengur senda tímalausa þætti sína á Rás 1 á sunnudagskvöldum út í beinni útsendingu. Þótti honum það mikil ósvinna.

Þeir sem þekkja til fyrirtækjareksturs ráku hins vegar upp stór augu og spurðu hvernig á því stæði að fjáraustur af þessu tagi hefði fengið að viðgangast í öll þessi ár – allan þann tíma sem forsvarsmenn RÚV hafa vælt yfir bágri fjárhagsstöðu. Skyldi nokkurn undra að staðan sé bág þegar svo skyni skroppnir þessir „allir“ eru?