Verkefnið Vorviður er að hefjast. Um er að ræða styrki til skógræktar á vegum félaga og félagasamtaka. Verkefnið er hluti af aðgerðaáætlun ríkisstjórnarinnar í loftslagsmálum. Markmiðið með Vorviði er að efla samstarf Skógræktarinnar og ýmissa félaga. Þannig geta þau bundið kolefni með skógrækt.
„Það er miðað við að þetta séu ekki félög sem fást sérstaklega við skógrækt heldur t.d. félagasamtök eða félög sem vilja kolefnisjafna starfsemi sína. Það gætu þess vegna verið kórar, kvenfélög eða golfklúbbar,“ segir Sæmundur Kr. Þorvaldsson skógræktarráðgjafi. Um níu milljónir króna verða settar í verkefnið. Það getur nægt fyrir 60-90 þúsund plöntum, eftir því hvað keyptar eru dýrar plöntur. Miðað við 2.000 plöntur á hektara gæti skógurinn orðið alls 30-45 hektarar.
Þau skilyrði eru sett að plönturnar séu ræktaðar í ræktunarstöð og telst það kostur ef hún er í heimahéraði. Styrkurinn er þó ekki til eigin plöntuframleiðslu. Eingöngu verður um að ræða endurgreiðslu kostnaðar við plöntukaup. Félög sækja um styrkinn til Skógræktarinnar og verður gerður samningur við hana um hvert verkefni.
Félög sem ætla að planta í land sem þegar er á skipulögðu skógræktarlandi munu njóta forgangs. Sæmundur segir að það borgi sig fyrir félög sem hyggjast sækja um styrk að afla sér fyrst formlegs leyfis landeiganda fyrir plöntuninni. Það geti t.d. verið á landi sveitarfélags, ríkisins, bænda eða annarra landeigenda þar sem gert er ráð fyrir skógrækt. gudni@mbl.is
Til baka
Leita í greinasafni
Prenta grein
