Tilraunaverkefni um notkun íslenskrar repjuolíu á snjóruðningstæki á Keflavíkurflugvelli er hafið. Í vikunni voru gerðar útblástursmælingar á afgasi tækisins þegar það keyrir einöngu á dísilolíu. Ætlunin er að keyra tækið á olíu með 5% íblöndun repjuolíu og gera mælingar á útblæstri til samanburðar og síðar einnig með 10% íblöndun.
Jón Bernódusson, verkfræðingur hjá Samgöngustofu, segir að borinn verði saman kolefnissparnaður og útblástur gróðurhúsalofttegunda við notkun þessara þriggja afbrigða eldsneytis. Einnig verða könnuð áhrif á síur og röralagnir vélarinnar.
Isavia og Samgöngustofa gerðu í haust viljayfirlýsingu um tilraunaverkefni sem er liður í viðleitni til orkuskipta á stórum tækjum og skipum. Framkvæmdin hefur tafist vegna kórónuveirufaraldursins. Ólafur Eggertsson, bóndi á Þorvaldseyri, flutti í vikunni þúsund lítra af repjuolíu til Keflavíkurflugvallar. Olían verður notuð til íblöndunar á eitt tæki, snjóruðningstæki sem hefur það hlutverk að hreinsa jaðar flugbrautanna. helgi@mbl.is
Til baka
Leita í greinasafni
Prenta grein
