Tvisvar á einum sólarhring var allt tiltækt lið slökkviliðs höfuðborgarsvæðisins sent að sama einbýlishúsi við Kaldasel í Breiðholti. Fyrra útkallið barst um klukkan 6:40 í gærmorgun og seinna útkallið barst klukkan 20:10 en þá hafði kviknað í þaki hússins að nýju.
Að sögn varðstjóra hjá slökkviliði höfuðborgarsvæðisins getur eldur blossað aftur upp í brunarústum eftir stórbruna eins og þennan. Slökkvistarfi lauk á ellefta tímanum í gærkvöldi.
Einn var inni í húsinu þegar fyrst kviknaði í en hann komst út af sjálfsdáðum þegar slökkvilið bar að garði.
Húsið fékk nýlega nýja eigendur, að sögn Gunnars Hilmarssonar, aðalvarðstjóra lögreglustöðvarinnar við Dalveg.
Tækni- og rannsóknardeild lögreglu vann á vettvangi í gær en hennar vinnu þar er nú lokið. Nú vinnur deildin úr þeim gögnum sem aflað var í gær.
Myndin hér að ofan var tekin eftir að aftur kviknaði í húsinu í gærkvöldi. 2
Til baka
Leita í greinasafni
Prenta grein
