Helgi Bjarnason
helgi@mbl.is
Bannað verður að nýta vindorku á nokkuð stórum hluta landsins, ef drög umhverfisráðherra að frumvarpi að breytingum á lögum um rammaáætlun og samhliða þingsályktunartillagu um stefnumörkun um flokkun landsvæða ná fram að ganga. Nær fyrirhugað bannsvæði yfir nokkuð á annað hundrað friðlýst svæði og svæði sem á að friðlýsa á næstunni, auk Vatnajökulsþjóðgarðs og óbyggðra víðerna á miðhálendinu.
Á öðrum viðkvæmum svæðum, til dæmis svæði innan 10 kílómetra frá friðlýstum svæðum og yfir 120 mikilvægum fuglasvæðum, er mögulegt að virkja vindorku að ákveðnum skilyrðum uppfylltum. Koma þau mál til kasta verkefnisstjórnar um rammaáætlun og umhverfisráðherra.
Sjálfkrafa vísað frá
Áformum um virkjanir á friðuðum svæðum verður aftur á móti sjálfkrafa vísað frá í upphafi ferils en verkefnisstjórn um rammaáætlun mun ekki hafa afskipti af áformum á svæðum utan bannflokkanna. Þar reynir frekar á skipulag sveitarfélaga og mat á umhverfisáhrifum.Kallað hefur verið eftir sérstökum reglum um nýtingu vindorkunnar sem lýtur að mörgu leyti öðrum lögmálum en vatnsafl og jarðvarmi. Þeim kröfum er svarað með þeim tillögum sem nú hafa verið kynntar í samráðsgátt stjórnvalda.