„Þetta verður vertíð, og við erum ánægð með það fyrir land og þjóð,“ segir Jón Björn Hákonarson, bæjarstjóri í Fjarðabyggð, um loðnuveiðar. Samkvæmt ráðleggingum Hafrannsóknastofnunar og ákvörðun sjávarúvegsráðherra verður heimilt að veiða samtals 127.300 tonn af loðnu á vertíðinni sem nú er að fara af stað af alvöru. Má vænta að sá afli skili þjóðarbúinu 17,5 milljörðum króna í útflutningstekjur.
Í Fjarðabyggð eru þrjár stórar loðnuvinnslur, það er Síldarvinnslan í Neskaupstað, Eskja á Eskifirði og Loðnuvinnslan á Fáskrúðsfirði. Eftir tvö loðnulaus ár, það er 2019 og 2020, var ekki gert ráð fyrir tekjum af loðnu í fjárhagsáætlun Fjarðabyggðar. Því eru peningar sem loðnan skilar nú í bæjarsjóð allir í plús miðað við þær væntingar sem fyrir voru.
„Þetta skilar milljörðum inn í hagkerfið hér á svæðinu. Þetta eru líka peningar sem koma sér vel vegna ýmissa framkvæmda á vegum sveitarfélagsins sem nú standa yfir. Þar má nefna byggingu íþróttahúss á Reyðarfirði og stækkun leikskóla á Eskifirði. Við höfum haldið striki í fjárfestingum til að halda uppi atvinnu á svæðinu og loðnupeningarnir koma sér því vel nú,“ segir Jón Björn. sbs@mbl.is
Til baka
Leita í greinasafni
Prenta grein
