Nasistablæti á Amazon Prime

Í svartasta skammdeginu í byrjun janúar horfði ég á þættina The Boys á streymisveitunni Amazon Prime. Þættirnir eru framleiddir af Prime og bera það með sér en þær þáttaraðir sem ég hef horft á hingað til frá Prime eiga allar nokkra hluti sameiginlega. The Boys fjallar um ungan mann í heimi þar sem ofurhetjur eru eins og hverjar aðrar Hollywood-stjörnur. Þær mæta á viðburði, kyssa börn og eiga skemmtigarða sér til heiðurs. Maðurinn ungi uppgötvar hina myrku hlið þessara vinsælustu stjarna Bandaríkjanna þegar unnusta hans deyr fyrir hendi einnar þeirra. Einkenni Amazon Prime-þátta, sem ég nefndi hér fyrr, eru einlægur en súrrealískur húmor þar sem venjulegt fólk finnur sig oft í óvenjulegum aðstæðum, jafnvel að bjarga heiminum, með skrautlegum aukapersónum og grófu ofbeldi. Undirtónninn er myrkur og tekið er á öllum helstu málefnum samtímans, kynþáttafordómum, kynbundnu ofbeldi og tilvistakreppu þúsaldarbarnanna. Það sem setur þó punktinn yfir i-ið og virðist vera rauði þráðurinn í þáttum Amazon er að ógnin sem stafar að heiminum eru nasistar frá seinni heimsstyrjöldinni, sem tókst að flýja örlög sín og hafa allar götur síðan skipulagt nýja aðför að heimsyfirráðum.